Нысанмæ гæсгæ уыдзæн 22-æм апрелы
2000 цæстдарæгæй фылдæр бацæттæ кæндзæн нæ республикæйы Центрон æвзарæн къамис, Уæрæсейы Федерацийы Конституцимæ ивддзинæдтæ бахæссыны Æппæтуæрæсеон хъæлæс кæныны бонмæ. Нысанмæ гæсгæ уыдзæн 22-æм апрелы. Уыдзæн фæлладуадзæн бон. Рæстæгæй раздæр схъæлæс кæнæн уыдзæн, хуыцаубонæй фæстæмæ. Æрмæст хъæуы Паддзахадон лæггæдты сайтмæ, кæнæ бирæвæрсыг центрмæ курдиат бадæттын. Центрон æвзарæн къамис сараздзæн 338 æппынæдзухдæр кусæг участочы æмæ ма 25 та – рæстæгмæ участоктæ. Алкæцыйы дæр, рæстæмбис нымадæй, уыдзæн 8 цæстдарæджы. Цæгат Ирыстоны Центрон æвзарæн къамисы сæрдар Моргуаты Жаннæ куыд радзырдта, афтæмæй, фыццаджыдæр ахсджиаг у адæмæн бамбарын кæнын, ивддзинæдтæ цæимæ баст сты, уый. Цæмæй алкæмæн дæр фадат уа фидарæй йæ цæстæнгас равдисын. Конституцийы ног уагæвæрдтæм хауынц: паддзахады хæс пенсийы индексацийы хъуыддаджы, стæй адæмæн лæвар медицинон лæггæдтæ кæнын. Уымæй дарддæр закъоны бындурыл хъæуы, цæрынæн æппынкъаддæры бæрц мызды æппынкъаддæры бæрцимæ сæмхуызон кæнын. Цæмæй Конституцимæ ивддзинæдтæ сæ тыхы бацæуой, уый тыххæй хъæуы æппæтуæрæсеон хъæлæсгæнджыты 50 процентæй фылдæр æрæмбырд кæнын.
