1 милуан сом райсыныл архайдзысты, хъæутæм кусынмæ чи ацæуа, уыцы ахуыргæнджытæ
2020-æм азы Цæгат Ирыстоны, Уæрæсейы иннæ субъекттимæ æмрæнхъ царды уадзын райдайдзысты программæ «Хъæуты кусæг ахуыргæнæг». 1 милуан сом райсыныл архайдзысты, хъæутæм кусынмæ чи ацæуа, уыцы ахуыргæнджытæ. Программæ царды куы рацæуа, уæд фадат ратдзæн ахуыргæнджыты нымæц фæфылдæр кæнынæн. Ныртæккæ федералон æмвæзадыл снысан кодтой конкурсы сæйраг домæнтæ. Педагог хъуамæ хъæуы бакуса 5 азы дæргъы. Конкурсы æппæт къæпхæнтæ уыдзысты æргом. Цавæр цæстæнгас ис программæмæ хъæуккаг скъолаты та, уый тыххæй радзурдзæн Дудиаты Джинæ.
Физикæйы урок Ольгинскæйы скъолайы. Уый фæстæ ахуыргæнæндоны директор Тебиаты Батрадз ацæудзæн иннæ урокмæ. Ацы хатт уыдзæн алгебрæ. Скъолайы дæтты фондз предметы: физикæ, алгебрæ, геометри, экономикæ æмæ астрономи.
Ольгинскæйы скъолайы æдæппæтæй ис дыууын æхсæз ахуыргæнæджы. Ахуырдзауты нымæц та у æртæ сæдæ дыууын фондз адæймаджы. Ныртæккæ хъæуккаг скъолайы нæ фаг кæны цыппар педагогы. Уымæ гæсгæ иуæй-иутæ амонынц цалдæр предметы. Ахæм фæткыл кусынц фæстаг афæдз æмæ рдæг. Æндæр гæнæн сын нæй.
Скъолайы сæ зæрдæ дарынц, программæ «Земский учитель» уавæр кæй аивдзæн, ууыл. Горæтæй хъæумæ ацæуыны фæнд чи скæна, уыцы ахуыргæнджытæн федералон бюджетæй ратдзысты фæйнæ милуан сомы.
Ахуыргæнджытæй курдиæттæ исдзысты апрелы онг. Дарддæр кусдзæн конкурсон къамис. Июлы та сбæрæг уыдзысты уæлахиздзаутæ. Милуан сомы хъæуты кусæг ахуыргæнджытæн ратдзысты дыууæ мины дыууынæм азы кæронмæ.
