Проектмæ гæсгæ фæндаджы хызы цалцæг цæуы нырыккон домæнтæ хынцгæйæ
2021-æм азы октябрьмæ нæ республикæйы нысан кæнынц федералон фæндаг А-163-йы дыууæ уаццаджы сцалцæг кæнын. Проектмæ гæсгæ фæндаджы хызы цалцæг цæуы нырыккон домæнтæ хынцгæйæ. Уæдæ Дзæуджыхъæуы дæр сæ тæмæны сты фæндæгты аразæн куыстытæ. Куыд цæуынц, уый феныны тыххæй та радон бæрæггæнæн рейды рацыдысты Æппæтуæрæсеон адæмон фронты цæгатирыстойнаг хайады эксперттæ.
Реданты сæйраг уынгмæ Æппæтуæрæсеон адæмон фронты цæгатирыстойнаг регионалон хайады эксперттæ се ргом цалдæр азы размæ аздæхтой. Куыстытæ райадайын дзы сæ бон нæ уыди, дондзæуæн хæтæлты рацарæзт дзы кæй цыди, уымæ гæсгæ. Ныртæккæ та доны коммуникациты куыст кæронмæ æрхæццæ, æмæ сæ хæстæ æххæст кæнынмæ бавнæлдтой фæндаггон кусджытæ.
Æндæрхуызон уавæр ис Доваторы проспекты æмæ Красногвардейскийы уынгты тигъыл. Ныр 10 азы дæргъы Намысы Аллеяйы цур цыппар уынджы тигъмæ рацæуæны 6 хайæ кусынц æрмæстдæр 3. Уый та арæх расайы аварион уавæртæм, æмæ зындзинæдтæ æвзарын кæны шофыртæн.
Колыты Аксойы уынджы та ног асфальт сæвæрдтой фарон. Æхсæнадон кусджытæ йын йæ хæрзхъæддзинадмæ ницы фиппаинæгтæ æрхастой, фæлæ дзы æнæмæнг хъæуы фистæгæйцæуджытæн ахизæн скæнын. Уымæн æмæ фæндагмæ хæстæг ис скъола. Сывæллæттæн æмæ сæ ныййарджытæн æндæр гæнæн нæ вæййы, æмæ фæндаджы сæрты ахизынц, куыд не мбæлы, афтæ. Къахвæндаг кæрæй-кæронмæ арæзт нæу. Машинæты змæлд дæр вæййы тæссаг. Уымæ гæсгæ æхсæнадон кусджытæ курдиат арвыстой Дзæуджыхъæуы администрацимæ.
Ацы бæрæггæнæн куыст адæмон фронты эксперттæн фæстаг хатт нæу. Цалынмæ ма хъарм рæстæг хæссы, уæдмæ арæзт æмæ цалцæггонд цæудзысты республикон фæндæгты ног уаццæгтæ. Æмæ æхсæнадон кусджытæ сæ цæст дардзысты куыстыты хæрзхъæддзинадмæ, фиппаинæгтæ та æрвитдзысты профилон ведомствотæм.
