Фронтовикты портреттимæ традицион цыд, чи зоны, æмæ арæзт æрцæудзæн 24-æм июны
Акци «Æнæмæлгæ полк» 9-æм майы ацæудзæн онлайн-форматы. Фронтовикты портреттимæ традицион цыд та, чи зоны, æмæ арæзт æрцæудзæн 24-æм июны. Уый, эпидемиологон уавæр куы фæхуыздæр уа, уæд. Уый тыххæй фехъусын кодтой змæлд «Æнæмæлгæ полкы» центрон штабæй. 58-æм æфсады службæгæнджытæ та Дзæуджыхъæуы райдыдтой сæхи Уæлахизы парадмæ цæттæ кæнын.
Карцамæ фæндаджы сæумæрайсом рацыдысты æфсæддон техникæйы экипажтæ. Уым æфтыдтой сæ фæлтæрддзинадыл, цæмæй иттæг хорз цæттæдзинад равдисой Уæлахизы бон Сæрибары фæзы. Раст рæнхъытæй рацыдысты фистæгæфсæддонмашинæтæ, бронетранспортертæ, зенитон-ракетон комплекстæ, стæй æфсæддон пъæлицæйы транспорт. Нырма уал сты фыццаг цæттæгæнæн мадзæлттæ парадмæ. Алы къæпхæн дæр у ахсджиаг. Шофыртæ æмæ механиктæ хъуамæ бæстон бацæттæ кæной сæхи, цæмæй, куыд æмбæлы, афтæ равдисой Уæрæсейы æфсæддон хъомыс.
