Хицæн номинацийы бацахста фыццаг бынат
Чи зоны æмæ нывкæнынады бæрзæндтæм схиздзæн нæ дарддæры æрмæджы хъайтар дæр. 7-аздзыд Афина Герасимиди уæлахиздзау сси аивæдты æппæтадæмон фестивалы Санкт-Петербурджы. Хицæн номинацийы бацахста фыццаг бынат. Йæ конкурсон куыст саразынæн ын баххуыс кодта Пушкины зындгонд уацмыс «Евгений Онегин». Ууыл Афинæ æрлæууынмæ нæ хъавы, фæлæ фæнд кæны радон сфæлдыстадон ерысы архайын. Уыдзæн Македонийы. Бæлвырддæр радзурдзæн Касаты Наирæ.
7 аздзыд Афина Герасимиди 2 азы æмæ рдæг архайы нывкæнынады. Къуыри 4 хатты цы ахуыртæм цæуы, уыдон æм кæсынц гыццыл, фæлæ ма йæхиуыл æнæрлæугæйæ кусы хæдзары дæр. Хатдзæг – сывæллæтты аивадон æппæтадæмон фестивалы уæлахиз. Ацыдис Санкт-Петербурджы.
Фестиваль «Ассамблея искусств»-ы архайджытæ уыдысты бæстæйы алы рæттæй мин сывæллонæй фылдæр. Афина дзы хуыздæрыл нымад æрцыди «Гравика»-йы конкурсы. Уæгъд темæйы номинацийы сси фыццаг бынаты аккаг. Й æ куыстæн ын скодтой бæрзон аргъ. Æвзонг нывгæнæг равзæрста хæлæртты темæимæ баст куыст. Ацы хъуыддагмæ йæ сразæнгард кодта Александр Пушкины сфæлдыстад.
Конкурсы рамбулынæн Афинæйæн баххуыс кодтой йæ мад æмæ йæ ахуыргæнæг Плиты Аленæ.
Разæй Афинæмæ æнхъæлмæ кæсы бирæ конкурстæ. Хæстæгдæр – Македонийы. Афинæ йæм ныридæгæн дæр у цæттæ.
