Абон йæ райгуырдыл сæххæст 220 азы.
Абон Уæрæсейы æмæ æндæр бæстæты дæр мысынц зындгонд уырыссаг поэт Александр Пушкины ном.
Абон йæ райгуырдыл сæххæст 220 азы. Уый кадæн мадзæлттæ арæзт æрцыдысты Цæгат Ирыстоны дæр. Дзæуджыхъæуы Пушкины номыл скверы æрæмбырд сты республикæйы сфæлдыстадон интеллигенцийы минæвæрттæ, Парламенты депутаттæ, скъоладзаутæ æмæ педагогтæ. Бæрæгбоны мадзæлттæ райдыдтой дидинджытæ сæвæрынæй. Уый фæстæ фæсивæд аив бакастысты поэты æнæмæлгæ рæнхъытæ. Цæгат Ирыстоны поэттæ дæр йæ номыл ныффыстой сæхи уацмыстæ. Александр Пушкины цард æмæ сфæлдыстадимæ баст мысинæгтæ хъуыстысты республикæйы Хæлардзинады Хæдзары дæр. Евгений Вахтанговы номыл Уырыссаг академион театры та Уæрæсейы Коммунистон Партийы хъæппæрисæй арæзт æрцыд бæрæгбоны концерт «Пушкины бонтæ Цæгат Кавказы». Ацы бон ма бæрæггонд цæуы уырыссаг æвзаджы бон дæр.
