Æппæт закъонхæлдтытæ лæвæрд æрцæудзысты ахуырады министрадмæ
Хорз разамонæгæй бирæ хъуыддæгтæ аразгæ сты. Мæйы размæ Уæрæсейы Президент æмæ нæ республикæйы Сæргълæууæг фæлхасадмæ цæстдарды управленийы специалистты зæрдыл æрлæууын кодтой, куыд ахсджиаг у скъолаты хæринаджы хæрзхъæддзинадмæ цæст дарын. Федералон æмбырдмæ ныстуаны Владимир Путин бабар кодта æппæт райдиан кълæстæ тæвд хæринагæй ифтонг кæнын. Уыимæ йæ хъуамæ уыной ныййарджытæ дæр. Ахсджиаг у алы кварталы дзуапдæттæг куыст кæнын. Æппæтуæрæсеон адæмон фронты активисттæ бабæрæг кодтой Цæгат Ирыстоны цалдæр ахуыргæнæндоны. Цавæр хатдзæгтæ скодтой, уый тыххæй радзурдзæн Касаты Наирæ.
Хæринаджы адæн аргъ кæнынц скъоладзаутæ сæхæдæг, йæ хæрзхъæддзинадæн та – æхсæнадон кусджытæ. Абон сæ менюйы макъаронтæ котлеттимæ æмæ салат. Дегустаци скæнынæн æнæхъæн переменæ. Аивæдты лицейы 1-æй 4-æм кълæсты онг ахуырдзаутæ сихор кæнынц 4 радæй.
Лицейы æппæты кæстæр фæлтæрæн ис сæрмагонд меню. Йæ хыгъды ис алыхуызон витаминтæ. 420 скъоладзау хæрынц дыууæ зонæйы, иуы дзы ис 70 бынаты иннæйы та 50. Хистæркъласонтæй кусы буфет. Æппæтуæрæсеон адæмон фронты активисттæ бæрæг кæнынц, хойрæгтæ ахуырады министрадæн æмæ фæлхасадмæ цæстдарды управленийы домæнтæн дзуапп дæттынц, æви нæ, стæй продукттæ цы уавæрты дарынц, уый. Хæрина цæттæ кæнынц скъолайы. Хæрæндоны кусы 8 адæймаджы. Æхсæнады минæвæртты фыццаг фиппаинаг – документаци раст конд кæй нæу, уый. Фарстатæ дзы сæвзæрд вентиляцион системæйы куыстмæ дæр, æмæ æрмæст уый нæ.
Æппæтуæрæсеон адæмон фронты эксперттæ сбæрæг кодтой Дзæуджыхъæуы 47-æм скъолайы хæринаджы уавæр дæр. Ам кæстæр кълæсты ахуыр кæны 500 сабийы. Ардæм продукци ласынц цæттæйæ. Абон сæм сихорæн ис къабускайæ конд хæринаг. Активисттæ бафиппайдтой хæрæндоны цур къухтæхсæнтæ кæй нæ кусынц, уый. Хæринаджы хыгъды дæр ссардтой, ахуырады министрады домæнтæн дзуапп чи нæ дæтты, ахæм æууæлтæ.
Порцитæ разындысты дыууæ хатты къаддæр. Менюйы фыст ис 150 граммы, æцæгæй та дзы разындис æрмæстдæр 74. Хæрæндоны кусджытæ зæгъынц, рæдыд уыди менюйы, зæгъгæ. Ацы хъуыддаг цæудзæн иртæстгонд. Æппæтуæрæсеон адæмон фронты минææвæрттæ тæвд хæринаджы хъуыддаг мониторинг кæнынц бæстæйы Президенты æмæ республикæйы Сæргълæууæджы домæнмæ гæсгæ.
Æппæт закъонхæлдтытæ лæвæрд æрцæудзысты ахуырады министрадмæ. Активисттæ куыд зæгъынц, афтæмæй ацы къабазы куыст цæудзæн дарддæр дæр. Цæстдард цæудзæн æрмæст горæты скъолатæ нæ, фæлæ районты дæр.
