Ацы аз уыцы нысантæн нæ республикæйæн радтой сæдæ æхсай иу милуан сомы федералон бюжетæй
Æппæтуæрæсеон адæмон фронты цæгатирыстойнаг хайад бæрæг кæны Дзæуджыхъæуы скъолаты ахуырдзаутæн цы хæринаг дæттынц, уый хæрзхъæддзинад. Ацы аз уыцы нысантæн нæ республикæйæн радтой сæдæ æхсай иу милуан сомы федералон бюжетæй. Ис дзы бынæттон бюджеты фæрæзтæ дæр. Хæринаджы номхыгъд у иумæйаг æмæ йæ сфидар кодтой бæрнон ведомствотæ. Фенæн æй ис скъолаты сæрмагонд сайтты. Фыццаг сменæйы чи ахуыр кæны, уыцы сывæллæттæн дæттынц аходæн, дыккаг сменæйы уæттæн — сихор. Ахуырад æмæ наукæйы министр Людмилæ Башаринæ бабæрæг кодта Дзæуджыхъæуы æмæ Горæтгæрон районы скъолатæ. Йæ фиппаинагмæ гæсгæ, хæринæгты номхыгъдмæ гæнæн ис æмæ бахæссой ивддзинæдтæ, сывæллæтты фæндонмæ гæсгæ. Алы скъолайы дæр ис аходæны фæтк, цæлгæнæны та алы къласæн дæр ис сæрмагонд стъол. Хæрæндæтты куыст цæуы Уæрæсейы фæлхасадмæ цæстдарды управленийы амынддзинæдтæ æххæст кæнгæйæ.
