Нырма уал 200 гектарыл ныссагътой талатæ
Паддзахадæй субсидитæ хорзырдæм ахадынц хъæууон хæдзарады къабазыл. Стыр æргом сæм аздæхтой республикæйы районты. Зæгъæм, Æрæфы районы ацы аз райдыдтой хъæддаг æхсæр зайын кæнын. Агрономтæ сæ зæрдæ дарынц хъæздыг тыллæгыл. Фæлæ уый тыххæй хъæуы зæрдиаг фæллой бакæнын, æмæ 5 азы банхъæлмæ кæсын. Нырма уал 200 гектарыл ныссагътой талатæ. Фидæны фæзуæттæ фæфылдæр кæндзысты. Нæ уацхæссæг Бокоты Виктория радзурдзæн бæлвырддæр.
Италийы кæй уарзынц, ахæм хъæддаг æхсæртæ-иу Цæгат Ирыстоны кæддæриддæр æрзадысты. Æрæфы æмæ Дыгуры районты уæвгæ дæр бирæ сты. Уымæ гæсгæ инвесторæн ацы фæзтæ бабар кодтой, цæмæй дзы æхсæрты куыст кæна промышленнон æмвæзады.
Йæ климæтмæ гæсгæ Æрæфы район Италийы æнгæс бæгуы дæр у. Зæххы æмæ уæлдæфы æууæлтæ хынцгæйæ. Уымæ гæсгæ агрономтæ сæ зæрдæ дарынц хъæздыг тыллæгыл. Фæлæ уый тыххæй хъæуы удуæлдайæ фæллой кæнын. Талатæ ныссагътой апрелы, сентябры та сæ хъæудзæн сæлвынын. Афтæмæй цалдæр азы фæстæ рахизæн уыдзæн автоматизацигонд куыстмæ. Уæвгæ, æхсæртæ хивæнд зайæгойтæм нæ хауынц. Уæдæ æрдзы фæзилæнтæм дæр фидар фæлæууынц.
Уымæ гæсгæ хъæддаг æхсæрты куыст кæнынæн бæллиццаг фидæн ис, зæгъынц куыстуаты. Рæстæмбис нымадæй бæлас цæры 100 азы.
Фыццаг хъæздыг тыллæгмæ æнхъæлмæ кæсынц 5 азы фæстæ.
Нырма уал 200 гектарыл ныссагътой 110 мин талайы. Куыстуаты зæгъынц – сæ архайд нысан кæнынц фæуæрæхдæр кæнын. Цалдæр азы фæстæ хъуамæ схæццæ уой мин гектары онг.
