Ацы хъуыддагæй зæрдæ æвæрынц Уыналы
Æцæг ирон цыхтæй æппæт Уæрæсе сифтонг кæнын. Ацы хъуыддагæй зæрдæ æвæрынц Уыналы. Афæдзы кæронмæ дзы хъуамæ скуса фыццаг цæгатирыстойнаг кооператив. Ныры онг æм бацыдысты 16 амалхъом адæймаджы. Æмæ уый нырма кæронбæттæн нымæц нæу, зæгъынц йæ саразджытæ. Кооперативмæ бацæудзысты æхсыры куыстгæнæг цех æмæ æхсыры чысыл фермæтæ. Зæгъæн ис, æмæ уыдзæн бирæвæрсыг комплекс. Кусдзæн Нузалы, Тибы, Æрхоны æмæ Зынцъары. Арæзтад ныридæгæн райдыдта. Кусæнгæрзтæ æлхæд æрцыдысты. Автопарк дæр ифтонг æрцыд хъæугæ сæрмагонд транспортæй. Проекты архайджытæ бадзырдтæ бафыстой нæ бæстæйы æппæты зындгонддæр базарадон хызтимæ, цæмæй сæ ифтонг кæной хæрзхъæд ирон цыхтæй. Кооперативы байгом кæнынмæ æнхъæлмæ кæсынц канд фосдарджытæ нæ, фæлæ ма Алагиры районы иннæ цæрджытæ дæр. Ног куыстуаты фæзындзæн 30 ног куысты бынатæй фылдæр. Уæвгæ та ахæм кооператив саразын бантыст «Хæххон территориты рæзты» федералон программæмæ гæсгæ. Уый æххæст кæнгæйæ, Уæрæсейы хъæууон хæдзарады Министрадæй райстой грант 12 милуан сомы.
