Алагиры бирæфатерон хæдзæртты бацæуæнтæ дезинфекци кæнынц алы бон дæр
Æхсæнадимæ æмархайд фæкъаддæр кæнын, æмæ æдасдзинады мадзæлттæ æххæст кæнын. Уыдон сты æнæмæнг хъæугæ домæнтæ, низы ныхмæ тох кæнынæн, зæгъынц специалисттæ.
Алагиры бирæфатерон хæдзæртты бацæуæнтæ дезинфекци кæнынц алы бон дæр. Сæрмагонд службæ «АлагирКомфорт» лæггад кæны 11 хæдзарæн. Ацы цæрæн объекттæ иу разамындæттæг компанийы балансыл дæр не сты. Фæлæ рохуаты дæр не сты. Æххуысхъуаг се ппæт не сты. Иутæ сæ хæдзæрттæ дезинфекци кæнынц сæхи хъарутæй.
Ныртæккæйы уавæр домы карз фæтк. Районы нæ кусы æхсæнадон транспорт, йæ куыст баурæдта автостанцæ. Автоколоннæ лæггад кæны 14 маршрутæн, се мбис цæуынц республикæйы иннæ районтæм. Ныртæккæ автобустæн сæ балц вæййы æрмæстдæр медицинон куыстуæттæм. Райсомæй адæмы баласынц сæ куыстмæ, æмæ сæ изæрæй фæстæмæ сæмбæлын кæнынц сæ хæдзæрттыл.
Районы рынчындон, поликлиникæ æмæ фельдшерон-акушерон пункт дæр сты карантины. Фæлæ уæддæр пациентты исынц. Алагиры районы рынчындонмæ инфекцион низтимæ ласынц республикæйы æппæт районтæй. Æдæппæтæй бацæттæ кодой 60 сынтæджы. Бахъуаджы рæстæг дзы сæ бон равæрын у 90.
Адæмы æнæниздзинад бахъахъхъæныныл дысвæлдæхтæй кусынц рынчындоны æппæт кусджытæ дæр. Хостæй цух не сты, фаг сæм нæй æрмæстдæр медицинон маскæтæ. Фæстаг цалдæр къуырийы маскæтæ балхæнæн иу афтекы дæр нæй.
Хæдзары бад зæгъгæ, уыцы домæн Алагиры се ппæт не ххæст кæнынц. Уынгты машинæты нымæц къуырийы райдианæй фæстæмæ фæфылдæр. Уæдæ скверкты сыгъдæг уæлдæфæй сулæфын кæй фæнды, уыдоны нымæц дæр къаддæр нæу.
Фæлæ хæдзарæй æддæмæ чи нæ цæуы, уыдонæн та кусы волонтерты штаб. Адæмæн продукттæ ласынц Дзæуджыхъæуы хайадæй. Волонерты куыстмæ се вæрæн хæссынц амалхъом адæм дæр. Зæгъæм, Бирæгъзæнджы маргъдарæн фабрикæ радон хатт радта æйчытæ. Ахæм акцитæ иу æмæ дыууæ хатты не скодтой.
Активисттæ продукттæ ласынц хыгъдмæ гæсгæ. Æрмæст Алагиры нæ, фæлæ æппæт районы хъæутыл дæр. Æххæссынц дзæрддзæф хъæутыл дæр. Сохъуырты Маргаритæ æмдзæрæны цæры иунæгæй. Хæдзарæй рацæуыны фадат ын нæй. Йе нæниздзинад у хъыгдард. Йæ ныхæстæм гæсгæ йын волонтерты æххуыс у тынг пайда.
Куысты ацы системæ снывыл кодта районы администраци. Æххæстгæнæн хицаудзинады оргæнтæ дæр сты карантины. Стæм хатт дзы цы æрбацæуджытæ вæййы, уыдоныл сæмбæлынц, куыд фæзæгъынц, гæрзифтонгæй. Дезинфекцигæнæн, тæвдбарæн… Ацы процедурæтæ сты æнæмæнг. Алагиры инфекциимæ тох кæныны штаб кусы æнæрлæугæйæ.
Хицауады æппæт оргæнты æмгуыстадæн ныридæгæн ис хорз фæстиуджытæ. Алагиры районы низ нæма рабæрæг. Цæмæй уавæр дарддæр дæр афтæ уа, уый тыххæй адæмы курынц, цæмæй сæ хæдзæртты уой, æмæ æнæхъуаджы æддæмæ ма цæуой.
