Йе нæниздзинад кæд цудыд у, уæддæр, ныр 10 азы æппынæдзух ис йæ уарзон «Алани»-йы цур
Аланийы талисман, профессионалон футболон лигæйы фарсхæцæг æмæ командæ «Ленингор»-ы тренер. Футболуарзджыты хсæн Хадаты Таймураз у, зæгъæн ис, стъалы. Йе нæниздзинад кæд цудыд у, уæддæр, ныр 10 азы æппынæдзух ис йæ уарзон «Алани»-йы цур. Æрæджы та, йæхæдæг дæр райдыдта рæзгæ фæлтæрæн спорты сусæгдзинæдтæ амонын. Йæ бæллиц сæххæст кæнын йæ къухы бафтыди зæрдæхæлар адæмы фæрцы. Командæ «Ленингор» æмæ йæ зындгонд хъомылгæнæджы тыххæй радзурдзæн Дудиаты Джинæ.
Тренеры сæрмагонд сигнал, æмæ лæппутæ матчы размæ райдайынц разминкæ кæнын. Цы хъазт сæм æнхъæлмæ кæсы, уый сын у æвзарæн къæпхæны хуызы. Фæсивæд æрбацыдысты, командæ «Ленингор»-ы архайыны тыххæй сæхи бафæлварынмæ.
Хи командæ, æмæ, зæгъæн ис, цардмæ тырнындзинад. Инвалиды коляскæйы чи ис, уыцы рыгон лæппуйы рагон бæллиц сæххæст. Республикæйы футболон дунейы Хадаты Таймуразы зонынц се ппæт дæр. Хонгæ та йæ кæнынц «Талисман». Йе нæниздзинад æй кæд тынг хъыгдары, уæддæр лæппу Аланийы матчтæй 10 азмæ иу дæр нæ ауагъта.
Æрæджы Таймураз нымад æрцыди профессионалон футболон лигæйы хуыздæр фарсхæцæгыл. Ныртæккæ та æрыгон лæппу йæ размæ вæры ног хæстæ æмæ нысантæ: хъазтæн сæрмагонд тактикæ скæнын, командæ разæнгард кæнын æмæ зæрдæмæдзæугæ бæрæггæнæнтæ æвдисын.
Футбол уарзынц сабибонтæй фæстæмæ, уыимæ, æнæхъæн бинонтæй. Стыр æххуыс æмæ ныфсы хос Таймуразæн сты йæ хиуæттæ. Йе фсымæр æмæ йæ хо гыццылæй нырмæ сты йæ уæлхъус.
Таймуразмæ фидæнмæ ис стыр бæллицтæ, æртæ азы фæстæ фæнд кæны республикæйы чемпионат рамбулын. Уый та ууыл дзурæг у, æмæ сæйраг тренермæ разæй æнхъæлмæ кæсы ахадгæ куыст.
