Нырыккон кусæнгæрзтæй ифтонг фабрикæ æмæ немыцаг кæрчытæ дæттынц хорз бæрæггæнæнтæ
Алцæмæй дæр автоматизацигонд фыццаг маргъдарæн фабрикæ скуыста Алагиры районы. Нырыккон кусæнгæрзтæй ифтонг фабрикæ æмæ немыцаг кæрчытæ дæттынц хорз бæрæггæнæнтæ. Куыстуаты архайдимæ, стæй цы нысантæ æвæры йæ разамынд, уыимæ базонгæ не сфæлдыстадон къорд дæр. Гаглойты Светланæ уыд Бирæгъзæнджы æмæ раргом кæндзæн сæ сусæгдзинæдтæ.
Алагиры районы райдыдта кусын ног маргъдарæн фабрикæ. Ис дзы нырыккон автоматикон ифтонггæрзтæ. Ахæм куыстуат нæ республикæйы у фыццаг. Маргъдарæн фабричы, автоматикон куысты фæткæй уæлдай ис, агъуысты уæлдæфы уымæладмæ æмæ рухсмæ цæст чи дары, ахæм ифтонггæрзтæ. Ам дарынц фæндзай мин каркæй фылдæр. Куыстуаты фæллой кæны фынддæс адæймаджы.
Фабричы цы мæргътæ дарынц, уыдонæн ис диссаджы уавæртæ. Дæттынц сын, фараст хъацæны кæм ис, ахæм сæрмагонд хæринаг. Æфтауынц æм æхсынæнтæ, мæнæу, нартхор, цæхх æмæ ма суанг витаминтæ дæр. Холлаг мæргътæм цæуы механизмы фæрцы. Фабрикæ уадзы фæлхасадон æйчытæ.
Ацы чысыл цех нырма ныр райдыдта кусын. Мæргътæн ис раст хæдзарон уавæртæ дæр. Алы къалатийы дæр ис фæйнæ авд карчы. Уымæй уæлдай ма куыстуаты ис, æйчытæ къоппыты кæм æвæрынц, ахæм агъуыст дæр. Продукци æвзарынц сортмæ гæсгæ.
Фермерон хæдзарады проект царды рауадзынмæ бахардз кодтой фæндзай милуан сомы. Уыдонæй аст милуаны радих кодта хъæууон хæдзарады министрад. Проект сæххæст кодтой æртæ мæймæ. Субсидитæй балхæдтой цъиутæ æмæ холлаг. Экспертты хъуыдымæ гæсгæ, маргъдарыны къабазы райрæзтæн нæ республикæйы ис егъау хъомыс. Уый тыххæй йæ бахастой гранттæ дæттыны программæмæ. Æххуыс ма кæнынц, фосдарыны къабазы чи кусы, уыдонæн дæр.
Маргъдарæн фабрик кусын райдыдта ацы аз октябры. Йæ продукци нырма хæццæ кæны æрмæстдæр Алагиры районы фæлхасгæнджытæм, фæлæ куыд фæстæдæр, афтæ рæздзæнис куыстуаты хъомыс, æмæ уый фæрцы æйчытæ æмæ карчы дзидзайæ æфсаддзæн иннæ районтæ дæр. Ацы хъуыддаджы дæр фабрик йæ зæрдæ дары хъæууон хæдзарады министрады æххуысыл.
