Уый фадат ратдзæн коллективты иммунитет фæфидар кæнынæн
Апрелы онг нæ республикæйы хъуамæ вакцинаци ацæуой цæрджыты 30 проценты онг. Уый фадат ратдзæн коллективты иммунитет фæфидар кæнынæн. Уый тыххæй журналисттимæ фембæлды фехъусын кодта Цæгат Ирыстоны æнæниздзинадхъахъхъæнынады министры хæдивæг Томайты Тамарæ. Æдæппæтæй вакцинаци ацæудзысты 210 000 адæймаджы. Прививкæ скæныны фадат ис алкæмæн дæр. Фыццаджыдæр дзы спайда кæндзысты социалон æмæ медицицнон къабазы кусджытæ, æфсæддонтæ, мидхъуыддæгты министрады æмæ администрациты минæвæрттæ. Æнæниздзинадхъахъхъæнынады министрад се ппæты зæрдыл лæууын кæны, процедурæ у лæвар, уыимæ фæндонмæ гæсгæ. Хи бафыссæн ис куыд колл-центрты æмæ медицинон куыстуæтты регистратурæты, афтæ Паддзахадон лæггæдты порталы дæр. Дзæуджыхъæуы 1-æм, 4-æм æмæ 7-æм поликлиникæтæй дарддæр прививкæты кæнын райдыдтой Мæздæджы районы дæр. Уырдæм уал арвыстой 400 вакцинæйы.
