Афтæ Дигорайы сцалцæг кæндзысты сывæллæтты поликлиникæ
Дзæуджыхъæуы ногæй фæзындзæн артисттæн æмдзæрæн. Хетæгкаты Къоста кæм райгуырд, уыцы хæдзар та æрцæудзæн цалцæггонд. Цавæр объекттæ ма фæзындзысты æмæ рацараздзысты, уый тыххæй журналисттæн радзырдта республикæйы арæзтады æмæ архитектурæйы министр Тотыккаты Артур.
Афтæ Дигорайы сцалцæг кæндзысты сывæллæтты поликлиникæ. Ныридæгæн ахæм куыстытæ райдыдтой Октябрьскæйы поликлиникæйы. Иу бонмæ дзы лæггад кæнынц 600 адæймагæн. Объект эксплуатацийы раттын нысан кæнынц афæдзы кæронмæ. Активонæй цæуы 11-æм скъолайы ног бæстыхайы арæзтад. Нырма уал дзы арæзт æрцыд 3 уæладзыджы. Зæронд бæстыхай та рацараздзысты. Нысан ма кæнынц Мацъутæйы æмæ Рæмонтыхъæуы ног фельдшерон-акушерон пункттæ саразын. Къостайыхъæуы æмæ Хуымæллæджы та фæзындзысты ног амбулаторитæ.
Дыгуры æмæ Алагиры районты сцалцæг кæндзысты аивæдты скъолатæ. Дарддæр цæуы республикон стадион «Спартачы» рацарæзт. Ведомствойы ма загътой, кæй бацæттæ кодтой проектон-сметон документаци ног Спорты Галуаны арæзтадæн. Уыдзæн Джызæлмæ фæзилæны районы, æмæ йæм цæуыны фадат уыдзæн 5 мин адæймагæн.
