Баст уыдзысты зындгонд уæрæсейаг ахуыргонд-иранист, этимолог æмæ профессор Абайты Васойы 120 азы бонимæ
Ацы аз декабры Цæгат Ирыстоны арæзт æрцæудзысты юбилейон мадзæлттæ. Баст уыдзысты зындгонд уæрæсейаг ахуыргонд-иранист, этимолог æмæ профессор Абайты Васойы 120 азы бонимæ. Уый тыххæй Указ бафыста республикæйы Сæргълæууæг Битарты Вячеслав. Вице-премьер Азымты Иринæйы разамындæй арæзт æмбырды организацион комитеты уæнгтæ æрдзырдтой юбилейон мадзæлтты пъланыл. Комитеты уæнгтæ сты æххæстгæнæн хицаудзинады оргæнтæ, наукон æхсæнады æмæ æхсæнадон организациты минæвæрттæ. Онлайн-бастдзинады фæрцы бæрнон кусджытæ æрдзырдтой рагагъоммæ нысантыл. Фæнд кæнынц Абайты Васойы наукон фæллæйтты æртæтомон æмбырдгонд рауадзын. Стæй ма сæрмагонд рауагъд «Nartamongæ»-йæн, æрыгон ахуыргæндты æмæ студентты конференци, ахуыргæнджытæн та лекциты цикл. Уымæй дарддæр арæзт æрцæудзысты: æппæтуæрæсеон конференци «Абайты Васойы кæстытæ», скъолаты номарæн уроктæ. Цæгат Ирыстоны социалон æмæ гуманитарон иртæстыты институты та байгом уыдзæн номарæн кабинет. Республикæйы цæрджытæн ма фадат уыдзæн зындгонд ахуыргонды тыххæй документалон кинонывтæ æмæ программæтæ фенынæн. Сæйрагдæр та Дзæуджыхъæуы Абайты Васойæн сæвæрдзысты цыртдзæвæн. Азымты Иринæ ма бабар кодта бæстон бакусын юбилейон мадзæлтты пъланыл, æмæ организацион фарстатыл.
