Дзæуджыхъæуы куыстуат «Спецэкосервис»-ы сæрмагонд техникæ знон изæры 8 сахатæй фæстæмæ сыгъдæг кæны фæндæгтæ
Ацы азы фыццаг митæруарды фæстиуджытæ иуварс кæнынц горæты уынгты. Дзæуджыхъæуы куыстуат «Спецэкосервис»-ы сæрмагонд техникæ знон изæры 8 сахатæй фæстæмæ сыгъдæг кæны фæндæгтæ. 15 сæрмагонд машинæйы æмæ 13 тракторы зилынц сæйраг уынгтæм æмæ къахвæндæгтæм. Цæмæй ма стыхсой шофыртæ æмæ фистæгæйцæуджытæ дæр. Абон горæты алы рæтты куыстой не сфæлдыстадон къордтæ дæр. Ацы азы фыццаг митыруардыл дзæуджыхъæуккæгтæ алыхуызон æнкъарæнтимæ сæмбæлдысты. Зæгъæн ис, æмæ зымæджы дыууæ мæйы дæргъы цæхæртæкалгæ урс митмæ æнхъæлмæ кастысты канд адæм нæ, фæлæ хæдзарон цæрæгойтæ дæр. Уыйбæрц рæстæг миты æруардмæ æнхъæлмæ кастысты горæты коммуналон службæтæ дæр. Сæрмагонд техникæ цæттæйæ лæууыди, уазæлттæ куыддæр райдыдтой, уæдæй нырмæ. Знон изæрæй фыццаг митæфснайæн машинæтæ рацыдысты горæты сæйраг уынгтæм. Афтæмæй шофыртæ дæр баззадысты разыйæ.
Сæ цин къаддæр у фистæгæйцæуджытæн. Къахвæндæгтыл цы бирæ мит уыди, уый ныр их фестад. Бирæтæн сæ куыстмæ, дуканимæ, кæнæ ахуырмæ фæндаг рауад цæлхдуртимæ.
Ныртæккæ фистæгæйцæуджыты фæндæгтыл дæр кусы сæрмагонд техникæ. Æххуыс ын кæнынц горæты хуымæтæг цæрджытæ дæр. Æмтгæй райсгæйæ, Дзæуджыхъæуы бынæттон администрацийы фидарæй зæгъынц, горæты службæтæ сæ размæ æвæрд хæстæ сæххæст кодтой, куыд æмбæлы, афтæ.
Ныртæккæ дæр мит уары, æмæ æфснайæн куыстытæ цæуынц дарддæр. Кæд та ногæй бахъæуа, уæд коммуналон службæтæ цæттæ уыдзысты горæты уынгтæм рацæуынмæ. Зæгъын ма хъæуы уый, æмæ социалон объектты раз сыгъдæг кæнынц Южныйы æмæ Заводскойы поселокты дæр.
Митæруард фæндæгтыл цы уавæр сæвзæрын кодта, уымæ йæ цæст дары Дзæуджыхъæуы æхсæнадон совет. Цæрджытæн сæ хъæстытæ æмæ фæндонтæ сæ бон фехъусын кæнын у æхсæнадон советы сыфты социалон хызты. Уый, фейсбук, вконтакте æмæ инстаграмы. Се ссарын интернеты зын нæу.
