Уæлдай фылдæр адæм дзы вæййы хъарм рæстæг
Бехъаны цады былгæрон нæ республикæйы цæрджытæн у уарзондæр фæлладуадзæн бынæттæй иу. Уæлдай фылдæр адæм дзы вæййы хъарм рæстæг. Арæх сæ фæстæ ныууадзынц бирæ бырæттæ. Уыдон та бахауынц донмæ. Рæстæгæй-рæстæгмæ фæлладуадзæн зонæйы саразынц рейдтæ æмæ экологон акцитæ. Фæлæ хатгай уыдон дæр афтæ ахадгæ нæ рауайынц. Ныр уыцы фарстайыл бакуыстой æндæр хуызы. Уый къухы бафтыд национ проект «Экологи»-йы фæрцы. Афтæмæй Бехъаны цадæн скæндзысты реабилитаци. Уæвгæ, Бехъаны цадæн ис егъау социалон-экономикон, рекреацион æмæ экологон нысаниуæг. Ныртæккæ ис Цæгат Ирыстоны æрдзы æвæрæнты министрады бæрны, æмæ йын радтой, уæлдай тынгдæр кæй хъахъхъæнынц, ахæм æрдзон территорийы статус. Ведомствæйы пресс-службæ куыд хъусын кæны, афтæмæй ныртæккæ цæттæ сты цады реабилитацийы гæххæттытæ, æмæ паддзахадон экспертизæйы хатдзæг. Цадмæ куы базилой, уæд дзы нысан кæнынц кæсæгтæ æмæ мæргътæ дарын, стæй ма бæлæстæ ныссадзын дæр.
