Сæрмагонд урнæ сæвæрдтой горæты центры, дукани «Гастроном»-ы
Беслæны байгом ис, чи нал бæззы, уыцы батарейкæтæ кæм исынц, ахæм пункт. Сæрмагонд урнæ сæвæрдтой горæты центры, дукани «Гастроном»-ы. Æппæтуæрæсеон адæмон фронты минæвæрттæ куыд зæгъынц, афтæмæй сæм ацы фарстайы фæдыл сæ курдиæттæ хастой Рахизфарсы районы цæрджытæ. Куыд зонæм, афтæмæй батарейкæтæ хаст æрцыдысты тæссагдзинады 2-аг къласмæ. Ахæм хауæддзæгтæ кæмфæнды æппарæн нæй. Нæй сæ иу кæнæн æрвылбоны бырæттимæ дæр. Радтын сæ хъæуы сæрмагонд бынæттæм, цæмæй сæ уый фæстæ ногæй бакусой, уый тыххæй. Ныртæккæ Уæрæсейы уыцы куыст кæнынц æрмæстдæр Челябинскы. Куыстуатмæ батарейкæтæ ласынц æппæт бæстæйæ. Цæгат Ирыстоны ацы проект æххæстгонд цæуы ныр 3-æм аз. Æдæппæтæй нæм ис 13 пункты. Уыдонæй 6 сты Дзæуджыхъæуы, 7 та районты. Контейнертæ ма æвæрд æрцæудзысты Горæтгæрон æмæ Кировы районты дæр.
