У 19 чиныджы æмæ сæдæгай уацты автор. Æцæг ахуыргæнæджы æмæ рухстауæджы ном хæссы сæрбæрзондæй
Бирæ хорз ныхæсты аккаг чи у, ахæм адæймаг. Аив дзырды дæсны, публицист, поэт æмæ æхсæнадон архайæг, Уæрæсейы Федерацийы сгуыхт ахуыргæнæг Советон Цæдисы паддзахадон премийы иунæг лауреат нæ республикæйы, стæй ма Уæрæсейы журналистты Цæдисы уæнг. Биазырты Валентинæ ацы бонты сбæрæг кодта йе 75 азы юбилей. У 19 чиныджы æмæ сæдæгай уацты автор. Æцæг ахуыргæнæджы æмæ рухстауæджы ном хæссы сæрбæрзондæй. Афтæ йæ хонынц Дзæуджыхъæуы 5-æм скъолайы рауагъдонтæ.
Стыр дамгъæйæ адæймаг æмæ ахуыргæнæг. Биазырты Тимофейы чызг Валентинæйæн аргъ кæнынц йе *мкусджытæ, æмæ чи йæ зоны, уыдон се ппæт дæр, стырæй чысылмæ. Алкæмæндæр сæ йæ хъуыды у иу. Ахæм адæм дуне кæнынц хуыздæр æмæ рæсугъддæр. Æмæ уыдон æрмæст хуымæтæг ныхæстæ не сты. Йæ чингуытæ йын нымайынц зонындзинæдты донгуырæныл. Уырыссаг æвзаг æмæ литературæйы урокты кæны рухстауæн куыст. Валентинæ скъолайæн снывонд кодта йæ царды 40 азæй фылдæр. Ацы ахуыргæнæджы уроктæ хуыздæрырдæм ивтой ахуырдзауты миддуне æмæ бирæ хæттыты уыдысты хъысмæтхæссæг.
Биазырты Валентинæ у 19 чиныджы автор. Йæ хицæн куыстытæ хаст æрцыдысты æмбырдгондтæм. Алы азты сæ ныммыхуыр кодта рауагъдад «Просвещение». Уыдонæй 7 чиныджы рухс федтой фæстаг 5 азмæ. Биазырты Валентинæйы фæллæйттæ лæггад кæнынц ахуырадæн, æмæ рæзгæ фæлтæры хъомыладæн. Йæ чингуытæ цымыдисаг сты куыд райдайгæ кæсджытæн, афтæ литературæ иртасджытæн. Уæдæ ахуыргæнджытæн та йæ куыстытæ сты зынаргъ лæварау.
Йæ уроктæ, поэзийы изæртæ, авторон зарджытæ, литературон-драмон равдыстытæ æрхæндæг зæрдæйы ахастимæ хъуыды кæнынц 5-æм гимназы бирæ фæлтæртæ. Валентинæйы зæрдæмæ арф чи бахызти, уыцы чингуытæй ист рæнхъытæ чиныгкæсджытæ искуы ферох кæной, уый дызæрдыггаг у. Биазырты Валентинæ йæ алыварс цы рæсугъд миниуджытæ парахат кæны, уыдон йæхæдæг та исы царды æцæгдзинадæй.
