Уыдон дыууæ къуырийы сæ фæлтæрддзинадæй хай кодтой цæгатирыстойнаг æмкусджытимæ, коронавирусæй рынчынты дзæбæх кæныны хъуыддаджы
Республикæйы Сæргълæууæг Битарты Вячеслав фембæлд мæскуыйаг дохтырты дыккаг бригадимæ. Уыдон дыууæ къуырийы сæ фæлтæрддзинадæй хай кодтой цæгатирыстойнаг æмкусджытимæ, коронавирусæй рынчынты дзæбæх кæныны хъуыддаджы. Кусæг къорды сæргъы уыди Мæскуыйы æнæниздзинадхъахъхъæнынады департаменты 17-æм клиникон рынчындоны сæйраг дохтыры хæдивæг Сергей Ларичев.
Бригады хыгъды уыдысты анестезиолог-реаниматолог Ольга Игнатенко, дохтыр-рентгенолог Багаты Нелли, дохтыр-пульмонолог Наталья Кириченко, дохтыр-инфекционист Анна Перцева, стæй медицинон хо-анестезист Гульджанар Айдарбаева. Цалынмæ мæскуыйаг специалисттæ Дзæуджыхъæуы уыдысты, уæдмæ æмбæлгæ æххуыс кодтой, сæхи амбулаторон уагæй чи дзæбæх кодта, уыдонæн, æмæ «сырх зонæтæ» кæй хонынц, уым уæвæг рынчынтæн дæр. Битарты Вячеслав раарфæ кодта дохтыртæн сæ профессионалон боны фæдыл, æмæ загъта сæ куыст тынг ахсджиаг кæй у, уый. Уæлдай арфæ сын ракодта, республикæйы дохтырты фарсмæ кæй æрбалæууыдысты, уый тыххæй.
Сергей Ларичев та загъта, Цæгат Ирыстоны кæй къаддæр кæны рынчынты нымæц. Республикæйы сæргълæууæг ма мæскуыйаг специалисттæн радзырдта, æрыгон дохтыртæн æххуысы программæйы тыххæй. Уый, 2030-æм азмæ социалон-экономикон рæзты стратегийы «фæндаггон картæйы» фæрцы. Кæронбæттæны Битарты Вячеслав мæскуыйаг дохтыртæн радта арфæйы фыстæджытæ.
