Зындгонд журналист Цæгат Ирыстонмæ ссыди документалон кинонывы архайынмæ
Республикæйы сæргълæууæг Битарты Вячеслав фембæлд телеканал «RT» æмæ Æппæтадæмон медиакъорд «Россия сегодня»-йы сæйраг редактор Маргарита Симоньянимæ. Зындгонд журналист Цæгат Ирыстонмæ ссыди документалон кинонывы архайынмæ. Исы йæ Æппæтуæрæсеон паддзахадон телерадиокомпани. Киноныв баст уыдзæн Беслæны 2004-æм азы сентябры трагикон цаутимæ.
Республикæйы сæргълæууæджы æмæ Хицауады пресс-службæйы хъусынгæнинагмæ гæсгæ, уыцы æнамонд хабары фæстæ схъомыл ног фæлтæр, æмæ хъуамæ зона нæ историйы зæрдæхалæн теракты æппæт хабæрттæ, адæймаджы хъæбатырдзинады тыххæй. Уыимæ йæ уыцы бонты равдыстой куыд хистæртæ, афтæ сывæллæттæ дæр. Маргарита Симоньян куыд загъта, афтæмæй нæ республикæйы цæуынц хуыздæрырдæм ивддзинæдтæ. Ирон адæмæн кæны уæлдай кад, æмæ йæ алы æрбацыд дæр ирыстойнæгтæн у ахсджиаг цау.
