Бæрæггонд куыд у, афтæмæй та фæстаг рæстæг коронавирусы инфекци кæны парахатдæр
Битарты Вячеслав та радон хатт профилон ведомствæты разамонджытæм фæсидтис, эпидемиологон домæнтæ фæкарздæр кæныны тыххæй. Бæрæггонд куыд у, афтæмæй та фæстаг рæстæг коронавирусы инфекци кæны парахатдæр. Ам ахсджиаг у, социалон дистанци æххæст кæнын, хи хъахъхъæнæн фæрæзтæй пайда кæнын, æмæ, бирæ адæм кæм æмбырд кæнынц, ахæм рæттæм ма цæуын.
Ацы тренажерон залы санитарон домæнтæ æххæст кæнын ныридæгæн сси сæ куысты æнæмæнг фæтк. Чи дзы кусы, уыдоны ныхæстæм гæсгæ, пандемийæйы размæ дæр центр хъуыстгонд уыди йæ сыгъдæгдзинадæй. Коронавирус куы рапарахат, уæд сæ сæхгæдтой 3 мæйы æмгъуыдмæ. Клиенттæн та ногæй залмæ цæуыны фадат куы фæцис, уæд разамынд санитарон домæнтæ фæкарздæр кодта цалдæр хатты.
Пандемийæйы рæстæг технологон центр «Баспик»-ы кусджытæй иу адæймагдæр уæззау рынчын нæ фæцис. Разамынды ныхæстæм гæсгæ, ам санитарон нормæтæ æххæст кæнынц бæрнонæй, хъуыддагмæ куыдфæндыйы цæстæй ничи кæсы. Алы ран дæр кварцæй рухсгæнæнтæ, рецеркулятортæ, санитайзертæ, кусджытæ ииуылдæр цæуынц маскæты. Короновирусæй рынчын адæмы нымæц та куы фæфылдæр, уæд куыстуаты фæзынди автоматикон термометрты системæ. Куыстмæ чи æрбацыди, уый тæвд нормæйæ фылдæр куы уа, уæд информаци фæзыны æдасдзинады экраныл, турникет та йæхæдæг æрæхгæны. Санитарон фæтк фæтыхджындæр кодтой Дзæуджыхъæуы трамвайты управленийы дæр. Ныртæккæ райсомæй æхсæвмæ линийыл фæкусы 15 вагоны. Трамвай кæройнаг æрлæууæнмæ куы æрбахæццæ вæййы, уæд шофыр бьазилы вагонмæ, скæны йын дезинфекци. Коронавирусы инфекци та ногæй кæй параха кæны, уымæ гæсгæ, алы адæймагдæр хъуамæ йæ æдасдзинадыл фыццаджыдæр хъуыды кæна йæхæдæг. Æххæст кæнын хъæуы æдасдзинады домæнтæ, æрмæстдæр ахæм хуызы ис бахъахъхъæнæн хи низæй.
