Не мзæххон æрыгон лæппу ныр цалдæр азы цæры æмæ кусы Ирландийы
Фыццаг ирыстойнаг спортсмен – бразилиаг джиу-джитсуйæ сау роны хицау Маматы Петр дæсныйадæвдисæг ахуыртæ скодта æмхæццæ хъæбысхæсты спорты хуызты академийы. Не мзæххон æрыгон лæппу ныр цалдæр азы цæры æмæ кусы Ирландийы. Уæвгæ, Мæскуыйæ Дублинмæ рейс цæхгæр аивта æвзонг лæппуйы цард. Ирландимæ ацæуын Беслæйнаг лæппуйæн уыд йе стырдæр бæллиц. Бæлвырддæр та йæ уыцы бæстæйæ фæндыди райдайын дунеимæ зонгæ кæнын. Уæд сфæнд кодта англисаг æвзаг сахуыр кæнын.
Ахуыры фæстæ Петр кусынмæ бацыди аудиты компанимæ. Уыцы-иу рæстæг йе ргом здæхта спортмæ дæр. Уæлдай тынгдæр йæ зæрдæмæ цыдысты æмхæццæ хъæбысхæсты хуызтæ. Уымæн æмæ райдыдтой парахат кæнын. Фæлæ равзæрста джиу-джитсу. Æрæджы Петр сси ацы спорты хуызы сау роны хицау. Уыцы цау канд йæхицæн æхсызгон нæу, фæлæ æнæнхъæн республикæйæн дæр. Ныртæккæ Петр активонæй йæхи цæттæ кæны алыхуызон ерыстæм, æмæ ма кæны тренеры куыст дæр. Уыимæ уый ахсы йæ царды фылдæр хай. Йæ хъомылгæнинæгты æнтыстдзинæдтæ йæхиуæттæй фылдæр нымайы. 15 азы фæстæ Маматы Петр ссыди йæ райгуырæн Ирыстонмæ, цæмæй кæстæр фæлтæры спортсментæн ирдæй равдиса йæ дæсныйад æмæ ацы спорты хуызы сусæгдзинæдтæ. Лæппуты гæнæнтæ базыдта семæ хицæнæй хæцгæйæ. Джиу-джитсу кæй парахат кæны, уый тынг ахсджиаг у республикæйы спортивон цардæн. Уыцы фарстайыл кусынц хъæбысхæсты хуызты академийы. Сæрмагондæй уый тыххæй арæзт æрцыдысты дæсныйадæвдисæг ахуыртæ. Рæзгæ фæлтæры раз ахæм дæнцæг куы вæййы, уæд уыдон, æнæмæнг, райдайынц спорты бæрзæндтæм бæллын.
