Демографийы уавæр хуыздæрырдæм аивын, чысыл бизнесы рæзтыл кусын æмæ адæмы царды хæрзхъæддзинад фæхуыздæр кæнын.
Ахæм амындтытæ абон хицауады сæрдар Тускъаты Таймураз радта Горæтгæрон районы социалон-экономикон рæзты æмбырды. Бынæттон администрацийы хатдзæгтæ скодтой ивгъуыд азы куыстæн, стæй сæвæрдтой фидæнмæ нысантæ дæр. Сæ сæйраг хæс у экономикæйы рæзтыл кусын. 2018-æм азы Горæтгæрон район бакуыста 400 милуан сомæй фылдæр. Уый, 2017-æм азимæ абаргæйæ, у 70 милуаны фылдæр. Ацы аз та се фтиæгтæ нысан кæнынц 13% фæфылдæр кæнын. Районы сæргълæууæг куыд загъта, афтæмæй сын ацы хъуыддаджы баххуыс кæндзæн промышленносты æмæ хъæууон хæдзарады активон рæзт. Хойраджы продукцийы куыстуæттæ иумæйагæй рауагътой 4 миллиард сомы. Аграрон сектор та бакуыста 7 миллиарды. 2018-æм азы йæ рæзтæн паддзахад радих кодта 80 милуан сомæй фылдæр. Æмбырды ма Тускъаты Таймураз куыд загъта, афтæмæй фыццаградон хæс у адæмы цард хуыздæр кæнын. Бынæттон администрацийы куыст та хъуамæ кæна ахадгæдæр.