«Мады зæрдæ», ахæм номимæ Дзæуджыхъæуы байгом мад æмæ сывæллоны кадæн фыццаг цыртдзæвæн. Скульптурæ æвæрд æрцыд, Къостайы проспекты æмæ Леваневскийы номыл уынгтæ кæм баиу вæййынц, уыцы ран.
«Мады зæрдæ», ахæм номимæ Дзæуджыхъæуы байгом мад æмæ сывæллоны кадæн фыццаг цыртдзæвæн.
Скульптурæ æвæрд æрцыд, Къостайы проспекты æмæ Леваневскийы номыл уынгтæ кæм баиу вæййынц, уыцы ран.
Дардæй кæсгæйæ у адæймаджы зæрдæйы
хуызæн, хæстæгмæ та – мад узæлы сывæллоныл. Автор, Цæгат Ирыстоны адæмон
нывгæнæг Ходы Николай дзы æвдисы æнæкæрон уарзондзинад æппæты
зынаргъдæр адæймагмæ. Цыртдзæвæн гом кæнгæйæ куыд радзырдта, афтæмæй ацы
сурæт аразгæйæ хъуыды кодта йæ мадыл. Уый 35 аздзыдæй 4 сывæллонимæ
баззад идæдзæй. Загъта алы мад дæр, уæлдай дæр та, хæсты зын рæстæг цот
чи хъомыл кодта, уыдон сеппæт дæр кæй сты сызгъæрин цыртдзæвæны аккаг.
Ходы Николай иу æмæ дыууæ цыртдзæвæны нæ
сарæзта æмæ нæ балæвар кодта республикæйæн. Ацы хатт дæр йæ радон
лæвармæ æрбацыдысты горæты администрацийы минæвæрттæ, æхсæнадон æмæ
сфæлдыстадон интелегенци.
Икъоты Бэла, Дзæуджыхъæуы муниципалон
сконды сæрдар: «Мады фæллой никуыма ничи бафыста. Æмæ чидæриддæр
æрбацæуа ардæм уый ахъуыды кæндзæн: «Цымæ мæ мадæн цы фæдæн», зæгъгæ.
Иннæтæ та æрбацæудзысты æмæ зæгъдзысты: «æз хъуамæ радтон мæ сывæллонæн
ахæм уарзондзинад, цæмæй уа амондджын». Æмæ уый у тынг хорз, иу адæймаг
афтæ куы ахъуыды кæна, уæд Ирыстоны уыдзæн фылдæр амондджын мадæлтæ дæр,
сывæллæттæ дæр. Стæй ма афтæ зæгъынмæ хъавын, уæ мады зæрдæтæ макуы
фæриссын кæнут».
Ходы Николай, скульптурæйы автор, Цæгат
Ирыстоны адæмон нывгæнæг: «Мады фыдæбон бирæ у æмæ махæй рох ма уæнт.
Ацы скульптурæ скодтон нæ мадæлтæн æмæ бирæ цæрæнт, сæ зæрдæхудты куыд
никуы бацæуæм, ахæм амонд нæ уæд».
