филиал вгтрк государственная телерадиовещательная компания “Алания”

12:20 пятница, 29 марта 2024
21 апреля 2021, 12:33
Дзæуджыхъæуы базарадон-экономикон техникумы бакуыстой, абарæн кæмæн нæй, ахæм дзулы рецептыл

Уый фадат дæтты хæрзад æмæ пайда продукт кæнынæн

Нырыккон дзулы пайдайаг æууæлтæ. Дзæуджыхъæуы базарадон-экономикон техникумы бакуыстой, абарæн кæмæн нæй, ахæм дзулы рецептыл. Уый фадат дæтты хæрзад æмæ пайда продукт кæнынæн. Дзулфыцджытæ хуымæтæг ссады бæсты, спайда кæнынц мæнæуы хъæддаг хуыз – полбæйæ. Хицæн кæны куыд йе ддаг бакастæй, афтæ йæ миниуджытæй дæр. Дзул фыцыны сусæгдзинæдтæ базыдта Фидараты Маринæ.

Ацы дзулы рецептæн ис иу сусæгдзинад. Пайда кæнынц хуымæтæг ссадæй нæ, фæлæ мæнæуы хъæддаг хуыз – полбæйæ. Хицæн кæны йæ хуызæй, йæ адæй, йæ миниуджытæй æмæ ма суанг йæ тæфæй дæр. Чи дзы ацаходыдта, уыдон æмхъæлæсæй зæгъынц, ахæм дзул хæргæйæ, банкъарæн ис æнгузы ад.

Полбæйæ конд дзулы рецептыл бакуыстой Дзæуджыхъæуы базарадон-экономикон техникумы технологтæ. Проекты разамонджытæ куыд зæгъынц, афтæмæй иртасæн куыст кодтой 4 азы, æмæ равдыста, нырыккон дзулфыцджытæ полбæйæ дзæгъæлы нæ пайда кæнынц. Уæвгæ ахæм кърупайы куыст у зындæр. Йæ цъар у хъæбæрдæр, фæлæ йæ пайдайаг æууæлты фæрцы продукты хæрдзтæ æхгæд æрцæуынц.

Диетологтæ зæгъынц – полбæйæ конд дзул æнæниздзинадæн дæр у пайда. Фыццаджыдæр æнæниз цардыуаг чи уарзы, уыдонæн, стæй ма фæмæллæгдæр уæвын кæй фæнды, ахæм адæмæн дæр. Уæдæ иннæ ахсджиаг фарста – бирæтæн сæ бон нæу, глютен кæм ис, ахæм хойраджы продукттæ хæрын. Сæ нымæц рæзы æппæт дунейы. Уыдонæн дæр ахæм дзул уыдзæн удæнцой.

Дзулы бæлвырд рецепт технологтæ хъахъхъæнынц цæстыгагуыйау. Ныридæгæн ын скодтой патент. Уæлдай зындæр уыд æнхъизæны хыгъд сбæлвырд кæнын. Уыимæ ахæм дзул фыцын, æмæ йæ базарадмæ бахæццæ кæнын æнцон хъуыддаг нæу. Уымæн йæ аххосæг бæрæг у – Цæгат Ирыстоны мæнæуы ацы хуыз парахат нæу. Сыхаг регионты та ссад æлхæнын зынаргъ у.

Проекты разамынды нысантæм гæсгæ фæнд кæнынц республикæйы Хицауадмæ курдиат бадæттын, цæмæй сын радих кæной хъæууонхæдзарадон зæххытæ полбæ ныссадзынæн. Уымæн æмæ Цæгат Ирыстоны климæт, куыд гæнæн ис, афтæ пайда у ацы кърупайы хуызæн.

vgtrk_alania
vgtrk_alania
vgtrk_alania
vgtrk_alania