Дзæуджыхъæумæ æрæмбырд сты 25 бæстæйы богæлттæ. Ацы ерыстæ сты традицион, æмæ дзы архайын сæхицæн кадыл нымайынц дунейы хуыздæр спортсментæ
Дзæуджыхъæуы фæци уæгъдибар хъæбысхæстæй турнир «Алантæ». Дзæуджыхъæумæ æрæмбырд сты 25 бæстæйы богæлттæ. Ацы ерыстæ сты традицион, æмæ дзы архайын сæхицæн кадыл нымайынц дунейы хуыздæр спортсментæ. Цалдæр боны спорты Галуан «Манеж»-ы къухбакæнæн нæ уыди. Трибунæты уæгъд бынæттæ нал баззад. Уæвгæ, хъæбысхæсты турниртæ Цæгат Ирыстоны цæрджытæм рагæй дæр æвзæрын кæнынц æгæрон цымыдисдзинад. Уымæ гæсгæ, ацы хатт дæр республикæ сси, зæгъæн ис, æмæ спортивон центр.
Æппæтадæмон турниры фæстаг бон, æцæгæй дæр уыди бæрæгбонау. Спортсментæ равдыстой ирд æмæ рæсугъд ныхмæлæуддзинад. Цæболты Хетæг фæуæлахиз Америкæйы иугонд Штатты минæварыл. Хыгъд 7:4.
Рæмонаты Сослан æрлæууыди йæ раздæры бынаты. Уый ныртæккæ зæгъæн ис фидарæй. Уæ зæрдыл уын æй лæууын кæнæм, амæй размæ цы цæф баййæфта, уый тыххæй къорд рæстæг йæ бон зæрдæйы фæндон архайын нæ уыди. Уый хыгъд Олимпаг чемпион рацыди финалмæ, æмæ фæуæлахиз Дагестаны спортсменыл 3:0 хыгъдæй.
Спортивон изæр нæ республикæйæн æрхаста 12 майданы, уыдонæй 5 сызгъæринтæ, дыууæ æвзист æмæ 5 бронзæ. Цæболты Хетæг æмæ Рæмонаты Сосланæй уæлдай ма иугонд командæйæн хæрзиуджыты къæбиц майдантæй фæхъæздыгдæр кодтой Кцойты Сослан, Уалыты Чермен æмæ Гæззаты Батраз. Цымыдисг уыди Бæйцаты Влдислав æмæ Кайл Снайдеры тох дæр. Америкаг богал разынди тыхджындæр, æмæ сси сызгъæрин майданы аккаг.
Финалы размæ уазджытæн равдыстой национ æууæлтимæ баст мадзал. Дзанайты Ольгæйы зæрæггæнджыты къорд, вокалон æмæ хореографион ансамбльтæ бацæттæ кодтой концертон программæ. Уый фæстæ спортивон бæрæгбоны архайджытæн бузныг загъта республикæйы Сæргълæууæг Битарты Вячеслав.
Турниры тыххæй йæ хъуыдытæ загъта Уæрæсейы спортивон хъæбысхæсты Федерацийы Президент Михаил Мамиашвили дæр.
Турниры коментатор знон уыди зындгонд хъæбысæйхæцæг æмæ зарæггæнæг Торнике Квитатиани. Йæхицæн кадыл банымадта ацы мадзалы архайын.
Турнир «Алантæ» фæци. Фæлæ алы спортуарзæджы зæрдæйы дæр ныууагъта арф фæд, æмæ бирæ рæсугъд æнкъарæнтæ.
