Цæгат Ирыстоны цæрджытæн æмæ уазджытæн бацæттæ кодтой тематикон фæзтæ
Дзæуджыхъæуы сбæрæг кодтой горæты бон. Ацы хатт афтæ парахат нæ уыди. Кæй зæгъын æй хъæуы, ивддзинæдтæ йæм хаст æрцыд республикæйы санитарон-эпидемиологон уавæры тыххæй. Фæлæ уый нæ хынцгæйæ, бæрæгбон рауад зæрдæмæдзæугæ. Цæгат Ирыстоны цæрджытæн æмæ уазджытæн бацæттæ кодтой тематикон фæзтæ. Алкæмæн дæр фадат уыд сæ тыхтæ спортивон ерысты бафæлварынæн æмæ армукъатæ фенынæн. Гæджиты Сослан радзурдзæн бæлвырддæр.
15 тематикон фæзы. Æмæ алкæцыйы раз дæр æмбырд кодтой адæм. Хъесайы-фырты уынджы Терчы былгæрон рацарæзты фæстæ сси аив æмæ зæрдæмæдзæугæ. Йæ бацæуæны волонтертæ уазджытæн уарстой маскæтæ æмæ дезинфекцион фæрæзтæ. Æнæмæнг хъуыди социалон дистанци æххæст кæнын. Уæвгæ, кæд пандемия ивддзинæдтæ бахаста, уæддæр бæрæгбон рауад хъæлдзæг. Чидæр йæх фæлвæрдта фат æмæ æрдынæй æхсынæй, чидæр та йæ къамтæ иста рагон машинæты цур. Уæдæ æппæтæй активондæртæн та фадат уыд чемпионимæ зарядкæ скæнынæн.
Цæгат Ирыстоны иунæг бæрæгбон дæр æнæ ирон чъиритæй æмæ нæртон бæгæныйæ нæ ацæуы. Цалдæр фæзы уыцы-иу рæстæг арæзт æрцыдысты дæсныйадæвдисæг ахуыртæ чъиритæ кæнынæй.
Сæхи традицион хæринæгтæй адæмы суазæг кодтой нæ республикæйы национ-культурон æхсæнадтæ. Дзæуджыхъæуы бон сбæрæг кæныны мадзæлтты архайдта Цæгат Ирыстоны Сæргълæууæг Битарты Вячеслав. Бабæрæг кодта æппæт тематикон фæзтæ. Федта æрмдæсныты аив куыстытæ. Суанг ма йын цымыдисаг лæвар дæр скодтой куырдадзы. Хицæн фæзы та æрбынат кодтой футболисттæ. Арæзт дзы æрцыд, «Аланийы» призтæ рамбулыны турнир. Ерысты архайдтой нæ горæты цыппар командæйы: «Спартак», «Барс», академитæ «Алания» æмæ «Юность». Футболон турниры уæлахиздзаутæн раарфæ кодта республикæйы Сæргълæууæг Битарты Вячеслав.
Мингай адæмтæ бабæрæг кодтой тематикон фæзтæ, æрмдæсныйады армукъатæ æмæ интеркативон фæзтæ. Дзæуджыхъæуы дыууæ сæдæ æртын æхсæз азы сбæрæг кæныны мадзæлттæ ацыдысты иу бонмæ. Цæмæй коронавирусы инфекци ма парахат кæна, уый тыххæй.
