Ахæм лæвар республикæйæн бакодта Уæрæсейы хъахъхъæнынады министры хæдивæг Цæлыккаты Руслан
Дзæуджыхъæуы тагъд æххуысы станцæ фæхъæздыгдæр æртæ реанимобилæй. Ахæм лæвар республикæйæн бакодта Уæрæсейы хъахъхъæнынады министры хæдивæг Цæлыккаты Руслан. Реанимобильтæ æххæст сты хъæугæ кусæнгæрзтæй, уыдоны фæрцы тагъддæр базонæн ис рынчыны уавæр, стæй йын уайтагъд баххуыс кæнын. Ис дзы улæфт аразæн аппарат, сæрмагонд наркоздæттæн, электрокардиограф, сæкæры бæрц бæрæг кæнæн. Куыстуаты разамындæн машинæтæй дæгъæлтæ радта Цæгат Ирыстоны сæргълæууæг Битарты Вячеслав. Куыд фæбæрæг кодта, афтæмæй, ныридæгæн тагъд æххуысы станцæйы машинæты 80 проценты ивд æрцыдысты ногтæй. Уыимæ раарфæ кодта, йæ райгуырæн Ирыстон чи нæ рох кæны, æмæ республикæйы царды чи архайы, уыцы амалхъом адæмæн. Битары-фырт ма загъта, дарддæр дæр æнæниздзинадхъахъхъæнынады къабазы инфраструктурæйы райрæзтыл куыст кæй цæудзæн.
