Аивадон-документалон уацы хуызы дзы адæмы размæ рахаста Цæгат Ирыстоны радио, телеуынынады æмæ кинематографийы Паддзахадон комитеты фыццаг сæргълæууæг Æгъуызарты Æхсарбеджы цардвæндаджы хабæрттæ
Радон æвæрæн та бахаста Ирыстоны сфæлдыстады къæбицмæ Цæгат Ирыстоны Паддзахадон университеты президент, историон наукæты доктор, профессор Мæхæмæтты Ахуырбег. Фыссæджы сисы бынæй рацыд ног чиныг «Æхсарбеджы кадæг». Аивадон-документалон уацы хуызы дзы адæмы размæ рахаста Цæгат Ирыстоны радио, телеуынынады æмæ кинематографийы Паддзахадон комитеты фыццаг сæргълæууæг Æгъуызарты Æхсарбеджы цардвæндаджы хабæрттæ. Чиныджы презентаци арæзт æрцыд фысджыты цæдисы. Мадзалы архайдтой Ирыстоны фысджытæ, журналты æмæ газетты минæвæрттæ. Презентацийы рæстæг куыд фæбæрæг кодтой, афтæмæй ахæм адæмты тыххæй хъæуы чингуытæ фыссын, цæмæй фидæны фæлтæртæ зоной сæ кадджын хистæрты сгуыхтдзинæдтæ. Чиныджы автор Мæхæмæтты Ахуырбеджы ныхæстæм гæсгæ зæрдиагæй бакуыста Æгъуызарты Æхсарбеджы кадæг ныфыссыныл. Фыссын æй райдыдта, иумæ газет «Рæстдзинад»-ы куы куыстой, уæд.
