У бирæ монографиты æмæ наукон куыстыты автор
Ахуыргонд-филолог, поэт æмæ æхсæнадон архайæг, ирон дзырды дæсны. Фыста æрмæстдæр æцæгдзинад æмæ зæрдæйы фæндмæ гæсгæ. Абон Джыккайты Шамилæн у йæ мысæн бон. У бирæ монографиты æмæ наукон куыстыты автор. Йæ фæллойы фæндаг Цæгат Ирыстоны паддзахадон университеты райдыдта 1970-йæм азты. 1990-æм азы та ирон филологийы æмæ журналистикæйы факультет куы байгом, уæд Шамиль сси ирон литературæйы кафедрæйы сæргълæууæг, 1996-æм азæй та ирон литературон сфæлдыстады кафедрæйы сæргълæууæг. Фольклор æмæ литературæйы фæдыл ныффыста 150 куыстæй фылдæр. Уыимæ уырыссаг æвзагыл фыст «Осетинская литература. Краткий очерк», стæй «Ирон литературæйы истори». Уæлдæр ахуыргæнæндæттæн æмæ скъолатæн рауагъта ирон фольклор æмæ литературæйы ахуырадон программæтæ. У 8-æм къласы ахуырдзаутæн ирон литературæйы чиныджы автор. Джыккайты Шамилы цард аскъуыд фыдгæнæджы къухæй 26-æм майы 2011-æм азы, Редантмæ хæстæг ран.