Кусджытæ сæ чингуыты фонд ралас-балас кæнынц иу ранæй – иннæмæ. Бирæ азты бæллынц хъæздыг библиотекæмæ.
Чингуытæ æмæ журналтæ кæсын уый хорз у, фæлæ сæ Елхоты цæрджытæ, сæ хæдзæрттæй уæлдай кæм кæсой, ахæм бынат сын нæй. Районы библиотекæйæн нæй йæхи бæстыхай. Кусджытæ сæ чингуыты фонд ралас-балас кæнынц иу ранæй – иннæмæ. Бирæ азты бæллынц хъæздыг библиотекæмæ. Фæлæ хъуыддаг йæ бынатæй не змæлы.
Елхоты библиотекæ ныр дыккаг аз æнхъæлмæ кæсы йæ хъысмæтмæ. 30 мин чиныджы бæттæн бастæй лæууынц къуымты. 3-аг хатт сæ ласдзысты ног бынатмæ, æмæ ногæй æххуырст бæстыхаймæ.
2017-æм азы Елхоты культурæйы хæдзары райдыдтой цалцæггæнæн куыстытæ, фæлæ дзы уый фæстæ библиотекæйæн бынат нæ баззад. Администраци уал рæстæгмæ бынат ссардта хи бæстыхайы, фæлæ ам бирæ нæ бафæстиат, ссардтой йын ног бынат, дзуапп дæтты æппæт домæнтæн.
Библиотекæйæн бынат скæнын хъæуы, куыд ис тагъддæр, афтæ. Скъоладзауты хъæуы ахуырадон программæмæ гæсгæ чингуытæ кæсын, уæдæ хицæн адæм дæр уарзынц сæ рæстæг чиныгимæ арвитын. Фæлæ та ног бæстыхай дæр уыдзæн рæстæгмæ. Библиотекæйæн цæттæ кæнынц, æдзух кæм уыдзысты, ахæм бæстыхай. Елхоты байгом кæндзысты нырыккон культурон центр.
Ныртæккæ проектмæ кæсынц эксперттæ, цæттæ кæнынц зæххы хай дæр. Библиотекæйæ фæстæмæ ма культурон райрæзты центры уыдзæн музыкалон скъола дæр.
