Уый фæрцы республикæйы клиникон рынчындон бацæттæ кæндзысты раздæры куысты фæткмæ, Беслæны бирæвæрсыг центрмæ та нал æрвитдзысты тыхст рынчынты
Фыццæгæм августæй фæстæмæ коронавирусæй рынчын адæмы исдзысты Дзæуджыхъæуы Тагъд æххуысы клиникон рынчындоны. Уый фæрцы республикæйы клиникон рынчындон бацæттæ кæндзысты раздæры куысты фæткмæ, Беслæны бирæвæрсыг центрмæ та нал æрвитдзысты тыхст рынчынты. Ныртæккæ клиникон рынчындоны ис 200 адæймаджы онг. Августы сæ арвитдзысты тагъд æххуысы рынчындонмæ æмæ бæлвырд дезинфекцийы фæстæ медицинон куыстуат раздæхдзæн йæ раздæры куысты фæткмæ.
Мæйы размæ дæр ма ацы хайад нымад уыд «Красная зона» кæй хуыдтой, ахæмыл. Ныр ууыл дзуры æрмæстдæр, пъолыл цы æрдæгхæлд фыст ис, уый. Тагъд æххуысы клиникон рынчындон 1-æм июлæй кусы йе рвылбоны фæткмæ гæсгæ. Карантины фæстæ дохтыртæ бацахстой сæ кусæн бынæттæ. Палатæтæ бацæттæ кодтой, ковид кæмæ нæй, ахæм рынчынтæн.
Фæлæ знонæй фæстæмæ рынчындон æрвылбоны фæткмæ гæсгæ нал кусы. Ногæй та рахызтысты, пандемийæйы рæстæг куыд куыстой, уымæ. 1-æм июлæй коронавирус кæмæ рабæрæг кодтой, кæнæ та гуырысхо кæуыл кодтой, уыдоны ластой æрмæстдæр республикон клиникон рынчындонмæ.
Республикон дзæбæхгæнæндоны абоны онг ис 200 рынчыны, се ппæты дæр раивдзысты тагъд æххуысы клиникон рынчындонмæ. Цы хуызы, ууыл цæуы куыст.
Ивд æрцæудзæн тагъд æххуысы машинæты куыст дæр. Хуымæтæг рынчынты ласдзысты æндæр медицинон кусæнуæттæм. Уыимæ зæгъынц, ивддзинæдтæ кæй нæ фæбæрæг уыдзысты медицинон лæггæдты хæрзхъæддзинадыл. Республикон клиникон рынчындон цы кусæнгæрзтæй ифтонг у, уыдон æндæр медицинон кусæнуæтты не сты. Уымæ гæсгæ ацы дзæбæхгæнæндон раздахын хъæуы йе рвылбоны фæткмæ. Уыимæ ма зæгъын хъæуы, уый дæр æмæ коронавирусæй рынчынты нымæц кæй фæкъаддæр, иннæмæй та тагъд æххуысы клиникон рынчындоны специалисттæм фылдæр фæлтæрдзинад ис.
