Бæстон æрлæууыд ивгъуыд азыл
Цæгат Ирыстоны афæдзы куысты хатдзæгты тыххæй йæ брифингы радзырдта республикæйы æнæниздзинадхъахъхъæнынады министр Годжысаты Тамерлан. Бæстон æрлæууыд ивгъуыд азыл.
Министр куыд бафиппайдта, афтæмæй æппæт медицинон куыстуæттæ ифтонггонд сты æмбæлгæ препараттæй, ковид-пациентты амбулаторон уагæй дзæбæх кæныны тыххæй. Ведомствойы разамонæг ма радзырдта фыццаг медицинон-санитарон æххуысы рæзты тыххæй. 2021-æм азы райдайдзæн фельдшерон-акушерон пунктты арæзтад æмæ рацарæзт. Уæлдай æргом аздæхтой сывæллæтты æнæниздзинадмæ. Ног соматикон корпус æххæстæй ифтонг у нырыккон кусæнгæрзтæй. Сывæллæтты диагностикон поликлиникæйы та фæзындзæн МРТ-аппарат. Ног ангиограф зынгæ фенцондæр кодта республикæйы тугдадзинтæ дзæбæхгæнæн центры куыст.
Онкологон низтимæ тох кæныны проект æххæст кæнгæйæ, онкодиспансеры фæзындзæн нырыккон кусæнгарз. Брифингы рæстæг Годжысаты Тамерлан бафиппайдта, республикæйы æппæт медицинон организацитæ ифтонггонд кæй цæудзысты куысты бынæттæй. Сæрмагондæй уый тыххæй бюджетæй радих кодтой 370 милуан сомы онг. Министр ма загъта, ахсджиаг кæй у кадрты фарста алыг кæнын. Хъæуы хирургон скъолайы рæзтыл кусын. Уымæн æмæ нæ фаг кæнынц патологоанатомтæ æмæ судмедэкспертизæйы специалисттæ.
