Хæрзаудæн аукцион Быгъуылты Сосланæн баххуыс кæныны тыххæй. У уæззау рынчын. Цæмæй йын дохтыртæ баххуыс кæной, уый тыххæй хъæуы 20 мин евройы. Ахæм фæрæзтæ бинонтæм нæй.
Хæрзаудæн аукцион Быгъуылты Сосланæн
баххуыс кæныны тыххæй. У уæззау рынчын. Цæмæй йын дохтыртæ баххуыс
кæной, уый тыххæй хъæуы 20 мин евройы.
Ахæм фæрæзтæ бинонтæм нæй. Уымæ гæсгæ цæгатирыстойнаг блогертæ сфæнд
кодтой аукцион саразын. Ныридæгæн се ххуысы хай бахастой бирæ адæм.
41-æм азы 24-æм июны газет, 53-æм азы
10-æм мартъийы газет «Гудок», 1980-æм азы олимпиадæмæ уагъд æвзист
æхцатæ æмæ æндæр цымыдисаг дзауматæ. Хæрзаудæн аукцион саразыны хъуыды
сæвзæрд, интернетæй чи пайда кæны, уыдонæй иумæ. Куы базыдта Быгъуылты
Сосланæн баххуыс кæнын хъæуы, уæд уæй кæнынмæ радта Дзæуджыхъæуы нывтимæ
зæронд къамтæ. Уыцы фæнд уайтагъд фæцыд информацион портал «15-æм
регион»-ы блогерты зæрдæмæ.
Фæрниаты Зауыр, хæрзаудæн аукционы
аразæг: «Æхцайæ фæстæмæ нын цыдæр дзауматæ хæссын райдыдтой. Зæгъæм,
Сталины пластинкæтæ, 36-æм азы. Тотоонты Алыксандр нын балæвар кодта,
Германийы цы дзаума балхæдта, уый. Уый у Гергиты Валерийы дзаума. Уыдон
ауæй кæндзыстæм уыцы аукционы æмæ Сосланæн баххуыс кæндзыстæм».
Аукционы уыдзæн 20 лоты бæрц. Дих кæнынц
3 къордыл: истори, культурæ æмæ спорт. Ныридæгæн бирæ адæм раздæхтой се
ргом Быгъуылты бинонтæм. Æрæмбырд кæнын бантыст 500 мин сомæй фылдæр.
Фæрниаты Зауыр, хæрзаудæн аукционы
аразæг: «Мæнмæ гæсгæ уый адæймагæн йæ сæйраг хæс у, иннæмæн æххуыс
кæнын. Ирон адæммæ уый уыдис тынг кадджын. Ацы хатт та кæмæн куыд йæ бон
у, афтæ æххуыс кæнынц».
15 азы фæстæ сценæйы ногæй музыкалон
къорд «The Shakemakers». Йæ архайджытæ æрæмбырд сты, цæмæй сæ аивадæй
равдисой сæ ахастдзинад ацы хорз хъуыддагмæ. Виктория Бабаеваимæ
акæндзысты цалдæр зарæджы.
Быгъуылты бинонтæ бузныг сты, чи сын
æххуыс кæны, уыцы адæмæй. Сослан лейкозæй рынчын кæй у, уый дохтыртæ
сбæрæг кодтой фарон. Ныр ын хъæуы сæрмагонд операци кæнын. Уымæн та
хъæуы 20 мин евройы. Ахæм фæрæзтæ бинонтæм нæй.
Быгъуылты Зæлинæ, Быгъуылты Сосланы
бинойнаг: «Ныртæккæ Сослан ис Мæскуыйы. Ахæм æххуыс нын кæй бакæндзысты,
уый æнхъæл нæ уыдыстæм. Ныр мæ йæхæдæг сабыр кæны, алцы дæр хорз кæй
уыдзæн, зæгъгæ. Уый бæрц адæм нын кæй æххуыс кæнынц, уый хъуамæ дзæгъæлы
ма уа».
Ахæм акци нæ республикæйы цæуы фыццаг
хатт. Йæ саразджытæ куыд зæгъынц, афтæмæй ахæм мадзалы фæрцы ис адæмæн
хорз æххуыс бакæнын. Уымæ гæсгæ, ацы аукцион фæстаг нæ уыдзæн.
Хæрзаудæн аукцион уыдзæн 2-æм ноябры.
Архайдзæн дзы 50 адæймаджы. Алчидæр сæ райсдзæн мæнæ ахæм хуынды
гæххæтт. Нысан кæны хæсты заманы фыстæг. Æмæ, чи зоны, зæрдæхæлар адæмы
иумæйаг æххуысы фæрцы бантысдзæн иу адæймаджы цард аирвæзын кæнын.
Хъайтмазты Дзерассæ
