Бирæтæ дзы спайда кодтой паддзахадон æххуысæй, æмæ райстой гранттæ
Куыстуарзондзинад хорзæхгонд æрцæуы грантæй. Хъæууон хæдзарады управлени, гæнæн æмæ амалæй архайы, куыд райдайгæ, афтæ фæлтæрдджын амалхъом адæмæн æххуыс кæныныл. Бирæтæ дзы спайда кодтой паддзахадон æххуысæй, æмæ райстой гранттæ. Уый фæрцы сæ цæхæрадæтты фæзынди хъæруматтæ. Не сфæлдыстадон къорд специалисттимæ бабæрæг кодта цалдæр хъæрмуаты. Рейды архайджытæ сæ баззадысты разыйæ.
Æрæджы цы мыггæтæ сагъд æрцыди, уыдон нырма гыццыл сты, фæлæ уый рæстæгмæ. Æртæ къуырийы фæстæ ацы бынат адæймаг зонгæ дæр нал бакæндзæн. Сæйрагдæр у уый, æмæ садзæн æрмæг у хæрзхъæд, зæгъы Къæбойты Мæдинæ. Æххуыс ын кæны йæ авдаздзыд чызг Варварæ. Уый дæр архайы, халсартæ зайын кæныны куыст базоныныл. Фылдæр ацы хъуыддæгтыл архайы йæ цардæмбал, йæ дæсныйадмæ гæсгæ у агроном. Мæдинæ та сахуыр кодта бугалтерыл, фæлæ йе вæрæн хæссы хъæрмуаты рæзтмæ. Йæ ныхæстæм гæсгæ, йæ райдианы йæ ныфс тынг нæ хаста. Уæддæр æрæмбырд кодта документтæ, æмæ сын стыр æхсызгонæн сæ курдиат банымадтой хорзыл. Ныр сæм сæ цæхæрадоны ис 400 квадратон метрыл хъæрмуат.
Ацы джитритæ нырма гыццыл сты, фæлæ ныридæгæн ис зæрдæ дарæн хъæздыг тыллæг дзы кæй рауаæдзæн, ууыл, зæгъынц районы хъæууон хæдзарады управленийы. Куыст хорзыл банымадтой республикон профилон ведомствæйы дæр. Сæ ныхæстæм гæсгæ, ацы куыстуарзаг бинонтæ сты раппæлинаг.
Гранты фæрцы сæ къухы бафтыди хъæрмуатмæ газ æмæ дон бауадзын дæр. Уый та гыццыл хъуыддаг нæу. Хъæрмуаты æдзух хъуамæ уа æмбæлгæ температурæ. Стæй, кæй зæгъын æй хъæуы, хуымтæ хъæуы донхорыгкæнын дæр. Уый хорз тыллæг æрзайын кæнынæн у хъæугæ фæрæз.
Ахæм технологитæм гæсгæ кусынц Комгæроны дæр. Ам ис дыууæ хъæрмуаты. Сæ фæзуæттæ сты уæрæхдæр – мин квадратон метры. Кочиты Алан кусын райдыдта йæхи хъарутæй. 2018-æм азы йæхæдæг равæрдта фыццаг конструкци. Уый фæстæ та сфæнд кодта паддзахадон æххуысæй спайда кæнын.
Алан йæ дæсныйадмæ гæсгæ у аразæг. Уымæ гæсгæ йын хъæрмуат саразын зын нæ уыди. Фæлæ халсарты куыст кæныныл та ахуыр кæны нырмæ. Уымæн æмæ дзы ис бирæ фæзилæнтæ.
Халсарты куыст чи кæны, уыдонимæ æдзух бастдзинад ис республикæйы хъæууон хæдзарады уаправленийы специалисттæн. Ведомствæйы сын сæ цæст дарынц се нтыстдзинæдтæм. Уый нæ, фæлæ ма сæм бахъуаджы рæстæг æрбацæуынц æххуысмæ дæр.
Специалистты ныхæстæм гæсгæ, иу къутæрæй сисæн ис 30 кг хæстæг продукци. Фæлæ уый æрмæстдæр раст куы архайай, уæд. Иу ныхасæй, ис цæмæ тырной, уый. Куыст цæуы, цæмæй сæ продукци дæттой республикæйы стыр базарадон хызтæм.
