Се ппæт дæр кæй уарзынц, уыцы фæткъуыты, кæрдоты, чылауиты æмæ алтъамиты хуызтæ ам сты парахатæй
Хъæздыг тыллæгмæ æнхъæлмæ кæсынц хæдзарад «Аланийы дыргъдæтты». Се ппæт дæр кæй уарзынц, уыцы фæткъуыты, кæрдоты, чылауиты æмæ алтъамиты хуызтæ ам сты парахатæй. Экологон æгъдауæй сыгъдæг дыргътæ æрзайын кодтой нырыккон дыргъдæтты, æмæ сæ фенæн ис канд бынæттон базарады тæрхæджытыл нæ, фæлæ ма сыхаг республикæты æмæ дæрддзæф регионты дæр. Куыд æфснайынц тыллæг хæдзарады, уый тыххæй радзурдзæн Сосранты Жаннæ.
Уæлдæфы рæгъæд фæткъуыты хæрздæф. Уый адæм æппæтæй фылдæр цы фæткъуыты хуызтæ уарзынц, Голден æмæ Гала. Бæлæсты лыстæг къалиутæ тыллæджы уæзæй æркъæдз сты. Аланийы дæргъдæтты æмбырд кæнынц тыллæг. Цалдæр мæйы дзы куыстытæ сты сæ тæмæны. Бригадтæ фæллой кæнынц райсомы 8 сахатæй, суанг изæрдалынгтæм. Сменæмæ иу адæймаг æрæмбырд кæны тоннæйæ фылдæр фæткъуытæ.
Ам ис бирæ фæткъуыйы хуызтæ. Семеренко, Голед, Инстар, Гала, Лостер. Ацы аз фæнд кæнынц 6 мин тоннæйы рæгъæд фæткъуытæ сæмбырд кæнын. Уый, фаронимæ абаргæйæ, у гыццыл къаддæр. Фæстагмæ цы талатæ ныссагътой, уыдон боныхъæд гыццыл бахъыгдæрдта.
Ацы дыргъдæттæ сты нырыккон хуыз, дыргъ дæттынц бирæ. Цæттæ дзы кæны экологон æгъдауæй хæрзхъæд тыллæг. Фæткъуытæ ацæуынц лабораторон иртæстытæ. Ацы дыргъдæтты тыллæг зæрдиагæй агурынц куыд нæхи регионы, афтæ сыхаг республикæты дæр.
Цæмæй базарадмæ хæрзхъæд дыргътæ бахæццæ уа, уый тыххæй сæ рмæст æрæмбырд кæнын нæ хъæуы, фæлæ ма сæ æмбæлгæ уавæрты дарын дæр. Фидæны нысан кæнынц хæдзарады территорийы уæлæмхасæн объект саразын. Уым æмбырд кæндзысты тыллæг. Проектон сметæйыл ныридæгæн кусынц. Тыллæг æмбырдгонд фæуыдзысты октябры кæрон. Хæдзарад фæнд кæнынц фæуæрæхдæр кæнын. Уымæн сын ис æппæт фадæттæ.
