филиал вгтрк государственная телерадиовещательная компания “Алания”

01:30 четверг, 29 октября 2020
17 сентября 2020, 15:09
146
Хетæгкаты Къостайы номыл Ирон литературæйы музейы сбæрæг кодтой Томайты Мисурханы юбилей

Ацы бонты Хетæгкаты Къостайы номыл Ирон литературæйы музейы сбæрæг кодтой Ирон фыссынады аивадмæ æрвылбон йæ вæрæн чи хæссы, æмæ йын удуæлдайæ чи лæггад кæны, уыцы курдиатджын фысджытæй иу — Томайты Мисурханы юбилей. Бирæ арфæйы ныхæстæ загъд æрцыди юбиляры номыл. Фæлæ йын сæйрагдæр у  йæ бирæ азты фæллæйттæ дзæгъæлы кæй не сты, уый.

Тæхудиаг, ныхасы фарнæй Хуыцауæй хайджын чи фæци! Уæлдай амондджын – уыцы хæзна йæ туджы фыдæлты хорзæхæй нысангонд кæмæн æрцыд! Ахæм адæймагæн цыма йæ зæрдæйы уадындз дæр аивдæрæй фæзæлы, стæй царды æрвылбоны ахорæнтæ дæр уæлдай ирдæй фæуыны , афтæ мæм кæсы. Арæх, зæрдæйæн хæстæг цы литературон уацмыс свæййы, уый рæнхъытыл цæст ахæсгæйæ, адæймаг æнахуыр хъуыдыты ахæсты бахауы. Зæгъæн ис, æмæ дзы дзырдæ вæййы зыбыты хуымæтæг адæймаджы хъысмæтыл, кæнæ та царды кæнæ æрдзы цавæрдæр фæзындыл, фæлæ курдиатджын фыссæджы алæмæтджын æвзагæй фыст рæнхъытæ кæсгæйæ, дисы бафтыс, ахæм ныхæстæ аргæ куыд скодта , зæгъгæ…

Рухæны мæйы 15-æм бон Хетæгкаты Къостайы номыл Ирон литературæйы музейы уыд кадджын мадзал. Ирон фыссынады аивадмæ æрвылбон йæ вæрæн чи хæссы, уыцы адæмы æрæмбырд кодта цины уавæр, бæрæг кодтой диссаджы рæсугъд удыхъæды хицау, æнахуыр фæлмæнзæрдæ адæймаг, курдиатджын фыссæг – Томайты Мисурханы юбилей.

Бæрæгбон арæзт æрцыд Националон музæйы гениралон директор Цогойты Батразы хъæппæрисæй. Арфæйы ныхæстимæ мадзал байгом кодта нæ республикæйы культурæйы министр Къубалты Эльбрус.

Фидарæй зæгъæн ис – Мисурхан литературон аивадæ, аив дзырдмæ уарзондзинад гуырцæй кæй рахаста, уый. Йæ фыд Томайты Мысырби уыд Ирыстоны хъуыстгонддæн кадæггæнæг. Адæмæн уарзон уыдысты йæ кадджытæ « Баделаты балц», « Хухы æмæ Нарсау», « Æлдарты Куыцыкк», «Нарты Батрадз» . Царды æцæг чи æрцыд, ахæм æнахуыр цаутыл фыст цаутæ. Ныридæгæн уыцы хæзнатæ, Мисурханы фæрцы иу чиныгмæ æмбырдгонд æрцыдысты.

Къæрцхъус у Мисурхан йæ кæстæртæм дæр. Фыссыны аивадмæ курдиаты цæхæр кæмæ рахаты, уымæн ныфсдæттæг æмæ рæствæндаг амонæг свæййы.

Æвæдза, куыд диссаг у ныхасы тых ! Хъуыдытæ æмæ æнкъарæнтæ уайтагър раст фæткмæ гæсгæ иумæйаг куыд æркæны. Уыцы алæмæтджын тыхæй хайджын адæм æрæмбырд сты ацы бæрæгбанмæ дæр. Сæ арфæтæн æмæ бузныджы ныхæстæн кæрон дæр нæ уыд . Арфæ кæнæм Мисурханæн мах дæр! Бузныг, нæ ирон литературæйы рагон хæзнадон уал æмæ уал азы зындзинæдтæй æнæтæрсгæйы, кæй бахъахъхъæдта, уый тыххæй!

Ошибка в тексте? Выделите её и нажмите «Ctrl + Enter»

Сообщить об опечатке

Текст, который будет отправлен нашим редакторам: