Æрдзырдтой адæмы хæдбардзинад æмæ конституцион бартæ бахъахъхъæныны фарстатыл
Хицауады хæдзары уыд республикæйы сæргълæууæг Битарты Вячеславы æмæ республикæйы конституцион тæрхондоны сæрдар Къесаты Станиславы фембæлд. Æрдзырдтой адæмы хæдбардзинад æмæ конституцион бартæ бахъахъхъæныны фарстатыл. Ныхас цыд хъæлæс кæныны фæткыл дæр.
Райдыдта 25-æм июны æмæ сæрмагонд бон уыдзæн райсом, 1-æм июлы. Республикæйы сæргълæууæг фæбæрæг кодта, цæмæй нæ бæстæ нымад уа егъау æмæ хæдбар паддзахадыл, уый тыххæй фæстаг 20 азы стыр куыст цыд. Ныртæккæ та æвзарджыты хъæлæстæй байгом кæндзыстæм Уæрæсейы азфысты ног сыф. Конститутцимæ цы ивддзинæдтæ хаст æрцыд, уыдонæн сæ фылдæр баст сты социалон-экономикон райрæзтимæ, цæмæй адæмы царды уавæртæ хуыздæр кæной. Битарты Вячеслав куыд бафиппайдта, афтæмæй алы адæймагæн дæр абон ис хорз фадат, цæмæй йæ хъæлæсæй сбæрæг кæна нæ бæстæйы фидæн.
