Нырæй фæстæмæ нæ республикæйы зындгонд авторты чингуытæ бакæсæн ис аудио-форматы дæр
Ирон фысджыты уацмыстæ кæнынц хæстæгдæр. Нырæй фæстæмæ нæ республикæйы зындгонд авторты чингуытæ бакæсæн ис аудио-форматы дæр. Уый къухы бафтыд проект «Чиныджы» фæрцы. Зæгъæн ис, æмæ арæзт æрцыд æнæхъæн онлайн-библиотекæ. Уацмыстæ бакæсæн ис социалон хызты дæр. Цæмæй æфтауы дисы ног проект, уый тыххæй радзурдзæн Фидараты Маринæ.
Гобозты Агуындæ аудиочингуытæм хъусын рагæй райдыдта. Ног проект «Чиныг» та йæ зонгæ кæны ирон авторты уацмыстимæ. Цæгат Ирыстоны паддзахадон университеты ирон филологийы факультеты студенткæ равзæрста Æгъуызарты Æхсарбеджы роман «Хурхæтæн». Дзурæг у Цæгат Ирыстоны районтæй иуы цардыл. Ахæм цымыдисаг историмæ национ музыкæйы зæлтæм хъусын тынг æхсызгон у.
Электрон библиотекæйы автор у активон архайæг Гæззаты Давид. Фарон рамбылдта грант, сæрмагондæй ацы проект царды рауадзынæн. Аудиочингуытæ арæзт æрцыдысты паддзахадон телерадиокомпани «Алани»-йы æххуысæй.
Аудиочингуытæ бакæсæн ис социалон хызты дæр. Сты æнцонархайд, стæй ма уарзон хъæлæстæм хъусын та уæлдай æхсызгон у. Уацмыстæ саив кæныныл бакуыстой Цæгат Ирыстоны адæмон артист, ирыстойнаг радио æмæ телеуынынады фыццаг диктортæй иу Мамсыраты Тасолтан, культурæйы сгуыхт кусæг, адæмон сфæлдсытады Хæдзары директор Лалыты Хъазыбег, нæ телерадиокомпанийы радиопрограммæты службæйы шеф-редактор æмæ амонæг Баллаты Маргаритæ.
Проект цымыдисаг у уымæй, æмæ адæмы зонгæ кæны ирон авторты уацмыстимæ, стæй ма фадат дæтты мадæлон æвзаджы рæсугъддзинадæй удæнцой исынæн. Уый та у сæйраг домæн, ирон æвзаджы рæзтæн æмæ йæ бахъахъхъæнынæн.
