Хохойты Ян, Хъодзаты Азæмæт æмæ Тигран Согоян ерысты рæстæг равдыстой уæлдæр æмвæзадыл бæрæггæнæнтæ, æмæ сын радтой Уæрæсейы чемпионаты архайынмæ путевкæтæ
Ирыстойнаг спортсментæ Цæгат Кавказы федералон зылды чемпионатæй сластой майдантæ. Хохойты Ян, Хъодзаты Азæмæт æмæ Тигран Согоян ерысты рæстæг равдыстой уæлдæр æмвæзадыл бæрæггæнæнтæ, æмæ сын радтой Уæрæсейы чемпионаты архайынмæ путевкæтæ. Ацæудзæн ноябры, Оренбургы. Спортсментæ ныртæккæ сæхи цæттæ кæнынц æнæрлæугæйæ. Бæлвырддæр – Касаты Наирæ.
Цæгат Кавказы федералон зылды радон ерысты уæлахиздзаутыл кадимæ сæмбæлдысты, стыр гæнæнтæ сын чи радта, уыцы спортивон скъолайы. Бирæ арфæйы ныхæстæн рæстæг нæй. Хуыздæр у, зонындзинæдтæ ныффидар кæнын. Ивгъуыд турнирæн хатдзæгтæ скæнын, æмæ дарддæр хиуыл кусын.
Грознайæ нæ республикæйы командæ сласта 3 майданы. Хъодзаты Азæмæт æмæ Тигран Согоян систы бронзæ хæрзиуджыты аккаг, Хохойты Ян æнтыстджынæй фæуæлахиз æртæ фембæлды, æмæ схызтис æппæты уæлдæр къæпхæнмæ. Архайы 57 кг уæзы.
Яны тренер Дзæгъойты Игорæн дæр ацы уæлахиз уыди ахсджиаг. Æртæ лæппуйы дæр уæлдæр æмвæзадыл бæрæггæнæнтæ равдыстой, уый иу, фæлæ ма Хохойты Ян та сæххæст кодта «Уæрæсейы спорты мастеры» норматив дæр.
Тренеры ныхæстæм гæсгæ, ныртæккæ алы спортсменæй дæр аразгæ у бирæ. Хъуамæ сæхиуыл кусой æнæрлæугæйæ. Разæй сæм æнхъæлмæ кæсы Уæрæсейы чемпионат. Цæгат Кавказы федералон зылды ерысты хатдзæгтæм гæсгæ йæм ацæудзысты æртæ уæлахиздзауы дæр.
