Ацы хатт конкурсы архайдтой сывæллæтты куыстытæ цалдæр номинацийы æмæ категорийы
Дзæуджыхъæуккаг æмæ Алайнаг епархийы алчыр Леониды арфæмæ гæсгæ Мæздæджы арæзт æрцыд æрвылазон конкурс «Цыппурсы лæгæт». Конкурс фæцæуы цыппурсæй доныскъæфæнтæм. Бакусынц ыл Мæздæджы районы администрацийы, культурæйы æмæ ахуырады хайæдты специалисттæ. Ацы хатт конкурсы архайдтой сывæллæтты куыстытæ цалдæр номинацийы æмæ категорийы: нывкæнынад, графикæ, æрмдæсныйад, нывæцæн, æмæ ма æндæр къабæзты. Иу дзырдæй – курдиатджын сывæллæттæн сæхи раргом кæнынæн фадат кæм ис, ахæмты. Сфæлдыстадон куыстыты сæйраг темæ – библийæ æмæ чырыстон дины цардæй ист цаутæ. Афтæмæй кад кæнынц чырыстон дины сæйрагдæр хъуыддæгтæн – хæларзæрдæйы ахастæн, кæрæдзийæн аргъ кæнынæн æмæ æмбæрынæн. Мæздæджы районы курдиатджын сывæллæттæ æмæ ныййарджытæ, сфæлдыстадон коллективтæ бынæттон культурæйы Галуаны бацæттæ кодтой зæрдæмæдзæугæ концерт. Уæлдай тынгдæр се ппæты зæрдæмæ фæцыд Мадымайрæмы номыл аргъуаны зарæггæнджыты коллектив. Акодтой Чырыстийы райгуырдимæ баст зарæг «Радуйся», æмæ æндæр зындгонд композицитæ. Кæронбæттæны конкурсы уæлахиздзаутæн радтой кады грамотæтæ æмæ зынаргъ лæвæрттæ.
