Бынæттон адæмон театры ног постановкæ ма иу хатт равдыста, ныртæккæйы зын уавæрты дæр хæдахуыр артисттæ цæттæ кæй сты æцæг аивад раргом кæнынмæ
Мæздæджы арæзт æрцыд Борис Васильевы уацмысмæ гæсгæ æвæрд спектаклы премьерæ «Завтра была война». Бынæттон адæмон театры ног постановкæ ма иу хатт равдыста, ныртæккæйы зын уавæрты дæр хæдахуыр артисттæ цæттæ кæй сты æцæг аивад раргом кæнынмæ. Мæздæджы адæмон театры уæнгтæ сценæмæ рацыдысты сæ разамонæг Людмилæ Скляровайы разамындæй.
Æрыгон коллективæн бантыст хæсты размæ рæстæджы сурæттæ æмæ цардыуаг равдисын. Уæвгæ, «Завтра была война» у Борис Васильевы ирддæр уацмысыл нымад. Иу рæнхъы лæууы советон дуджы классикон прозæйы зындгонд уацмыстимæ. Мæздæджы адæмон театры спектакль театрдзуатæн фадат дæтты авторы хъуыдытæ базонынæн. Уыимæ зындгонд фæрстытæн дзуæппытæ раттынæн – куыд æхсызтой уæлахиз, цавæр ахадындзинад уыд уæды скъолайæн, цæмæй рæзгæ фæлтæрмæ патриотон хъуыдытæ гуырын кæной, уый тыххæй.
