Спорты Галуан «Манеж»-ы уыдзæни боксы изæр
Майрæмбоны Дзæуджыхъæу суыдзæни, зæгъæн ис, боксы дунейы центр. Спорты Галуан «Манеж»-ы уыдзæни боксы изæр. Сæйраг цау дзы уыдзæни Федор Чудинов æмæ Ндам Нжикамы ныхмæлæуддзинад. Чудинов ацы тохмæ йæхи цæттæ кодта Сланты Виталийы разамындæй. Цæттæгæнæн мадзæлттæ ныридæгæн фесты. Знон боксертæ дзыллон информацион фæрæзтæн скодтой гом тренировкæтæ. Тренерты ныхæстæм гæсгæ, дыууæ спортсмены цæттæдзинад дæр у иттæг хорз. Уымæ гæсгæ, сæ тох уыдзæни ирд æмæ цымыдисаг. Уæвгæ, Федор Чудиновæй уæлдай боксы изæры архайдзысты Сланты Виталийы иннæ хъомылгæнинæгтæ дæр. Изæры дыккаг сæйраг тох та уыдзæни Хуыгаты Аланы архайдимæ. Уымæй уæлдай сæ цæттæдзинад равдисдзысты Байаты Сослан, Моурауты Хетæг, Къæбысты Алан æмæ Тыбылаты Алыксандр.
