филиал вгтрк государственная телерадиовещательная компания “Алания”

17:39 пятница, 29 марта 2024
28 августа 2020, 21:20
Нæ республикæйы дуканиты тæрхæджыты фæстаг рæстæг арæхдæр фенæн ис бынæттон куыстуæтты продукци

Рæхджы ма сæм бафтдзæн туаг æхсыры ноджыдæр иу хуыз

Нæ республикæйы дуканиты тæрхæджыты фæстаг рæстæг арæхдæр фенæн ис бынæттон куыстуæтты продукци. Рæхджы ма сæм бафтдзæн туаг æхсыры ноджыдæр иу хуыз. Уыдзæн биокефиры  æууæлтæм гæсгæ арæзт. Уадзын æй райдайдзысты Рахизфарсы районы – Заманхъулы. Ног цехы сæйраг нысан у – Цæгат Ирыстоны цæрджыты пайдахæссæг продукцийæ сифтонг кæнын. Цавæр нысанмæ ма æвæры куыстуат йæ размæ, уый тыххæй радзурдзæн Хъайтыхъты Фатимæ.

Ног æхсыры продукци уадзæн куыстуат райдайы лабораторийæ. Ам, хæххон паддзахадон аграрон университеты биотехнологийы кафедрæйы архайынц туаг æхсыры бактеритæ уадзыныл. Иууылдæр сты органикон æрмæджы бындурыл конд.

Ахуыргæндты хъуыдымæ гæсгæ, процесс у сфæлдыстадон. Органикон хъацæнтимæ алыхуызон комбинацитæ аразгæйæ, фадат ис æппæтæй ахадгæдæртæ равзарынæн. Уыдонæй пайда кæндзысты егъау куыстады. Ацы дæнцæгыл дзургæйæ та фидарæй зæгъæн ис, æмæ бакуыстой сæрмагонд æнхъизæныл. Уый фæрцы æхсыр пайда уыдзæн алыхуызон низты профилактикæйæн æмæ микрофлорæ фидар кæнынæн. 

Æнхъизæнимæ иунæг пробиркæ фадат дæтты егъау процесс скусын кæнынæн. Уыдзæн Заманхъулы. Цех, зæгъæн ис, æмæ цæттæ у йæ архайд райдайынмæ. Уадздзысты дзы туаг æхсыры дыууæ хуызы продукты, биокефирмæ æнгæс. Æппæт сусæгдзинæдтæ йæ разамонджытæ нæ схъæр кодтой, фæлæ бæрнон кусджыты зæрдиагæй суазæг кодтой. Куыстуаты бындуртимæ базонгæ сты Цæгат Ирыстоны хъæууон хæдзарады министрады специалисттæ.

Куыстуаты директор куыд радзырдта, афтæмæй скусынмæ хъавынц ацы бонты. Ныридæгæн сбæлвырд кодтой, хомаг кæцæй исдзысты, стæй сæ продукци кæдæм æрвитдзысты, уыцы хъуыддæгтæ. Æхсыры 80 проценты сæм ласдзысты Рахизфарсы районы фермертæ.

Хъæууон хæдзарады æмæ хойраджы министрады специалисттæ куыд загътой, афтæмæй цæттæ сты æмгуыстадмæ, æмæ ног цехæн баххуыс кæнынмæ.

Паддзахадон æххуысы программæтæй дарддæр, хъæууон хæдзарады министрады эксперттæ бахастой фæндон, цæмæй ног куыстуат æнгомдæр архайа Цæгат Ирыстоны æмæ сыхаг республикæты фермерон хæдзарæдтимæ.

vgtrk_alania
vgtrk_alania
vgtrk_alania
vgtrk_alania