Уыдонæй 32 минæй фылдæр ныридæгæн схардз кодтой.
Абоны онг нæ республикæйы мадæлты капиталæн сертификаттæ райстой 56 мин бинонтæй фылдæр. Уыдонæй 32 минæй фылдæр ныридæгæн схардз кодтой. Кæй зæгъын æй хъæуы, мадæлты капиталы хицæуттæ сæ фæрæзтæй спайда кæнынц цæрæнуæттыл, ипотекæйыл æмæ ахуырадыл. Бæлвырддæр радзурдзæн Касаты Наирæ.
Къултыл сывæллæтты нывтæ. Сæ фарсмæ та цалцæггæнæн куыстыты пълан. Фæндтæ æмæ нысантæ бирæ. Фатер ног нæу. Амæй размæ дæр дзы цардысты бинонтæ. Ныр дзы ис æртæ сывæллоны. Нырмæ цардысты æххуырст фатеры.
Гиоты Алинæ куыд зæгъы, афтæмæй ацы бонмæ æнхъæлмæ кастысты цалдæр азы. Райстой сертификат. Спайда кæныны фадат сын дзы куыддæр фæци, афтæ та пенсион фондæй райстой сæрмагонд æвдисæндар, æмæ бацыдысты, фатер чи уæй кодта, уымæ. Хæдзар агуырдтой рагæй. Уый фæстæ курдиат бахастой бирæвæрсыг центрмæ, бафыстой бадзырд. Уым документтæ сфидар кодтой, æмæ сæ растыл банымадтой Росреестры дæр.
Мадæлты капиталæй арæхдæр спайда кæнынц сæ цæрæн уавæртæ фæхуыздæр кæнынæн. Фæлæ фæрæзтæ схардз кæнæн ис æрмæст фатер кæнæ хæдзар балхæнынæн нæ. Закъонмæ гæсгæ ма дзы ис бирæ фадæттæ. Се хсæн – сывæллоны ахуырад. Спайда кæнын дзы бафæндыди Хъотайты Альбинæйы дæр.
Пенсион фонды зæгъынц, мадæлты капитал æххæстгонд цæуы 13 азмæ хæстæг. Организацийы информацимæ гæсгæ, фæрæзтæ къухмæ райсæн нæй. Адæмæй курынц, цæмæй цæстфæлдахджытыл ма баууæндой. Фæлтау бацæуæд пенсион фондмæ, æмæ бынаты консультаци райсæд.
Уымæй уæлдай, мадæлты капиталæй спайда кæнæн ис хайгай, кæнæ та фиддонтæ алы мæй дæр исын. Иннæ азы райдиан 5 азмæ фыццаг хатт фæрæзтæ æрцæудзысты индексацигонд, æмæ суыдзысты 466 мин сомы.
