Иуæй-иу куыстуæттæ сæ фæллойгæнджыты рвитынц дардмæ куыстмæ
Нæ республикæйы рæзы коронавирусæй рынчынты нымæц. Фæстаг суткæмæ стационартæм баластой 83 адæймаджы. Афтæмæй пациентты иумæйаг нымæц фæфылдæр 500 адæймагæй. Уымæ гæсгæ фылдæр æргом здæхт цæуы санитарон домæнтæм. Иуæй-иу куыстуæттæ сæ фæллойгæнджыты рвитынц дардмæ куыстмæ.
Бахизæны къухтæн дезинфекци скæнын, æмæ маскæ бакæнын. Ахæм æдасдзинады домæнтæ ныртæккæ æххæст кæнынц Пенсион фонды хайæдты. Адæмæн сæ фылдæр уавæр æмбарынц. Ардæм æрбацæуынц куыд хистæр кары, афтæ ныййарджытæ сæ сывæллæттимæ дæр. Зын эпидемиологон уавæр хынцгæйæ, хъæуы æдасдзинады мадзæлттæ æххæст кæнын. Уымæн æмæ суанг мартъийы Уæрæсейы Пенсион Фонды управлени хаст æрцыд, пандемияйы рæстæг йæ архайд чи нæ бауромзæн, уыцы организациты хыгъдмæ.
Августы хайады кусджытæ рахызтысты ног куысты фæткмæ. Фондмæ бацæуæн ис къуыри æртæ боны: къуырисæры, дыццæджы æмæ цыппæрæмы. Афтæмæй хъахъхъæнынц куыд æрбацæуæг адæмы, афтæ управленийы кусджыты дæр.
Дардмæ куыстмæ нæ рахызтысты куыст дæттыны центры специалисттæ дæр. Низ парахат кæныны фыццаг уылæны рæстæг ведомствойы сбæлвырд кодтой лæггæдтæ кæныны ног фæтк. Бакуыстой æдасдзинады мадзæлттыл, инспекторты куысты бынæттæ ифтонг сты хъахъхъæнæн экрантæй, фæлхасгæнджытæй та курæг сты, цæмæй бæстыхаймæ бахизгæйæ дарой маскæтæ.
Æнæрлæугæйæ кусынц Æнæнхъæлæджы уавæрты министрады кусджытæ дæр. Ирвæзынгæнджытæн дардмæ кусæн ницы хуызы ис. Æрмæст, 65 азæй фылдæр кæуыл цæуы, уыдонæн радтой ахæм бар. Иннæ кусджытæн та цæмæй адæмы ирвæзын кæнын сæ бон уа, уый тыххæй сарæзтой æппæт уавæртæ. Рæстæгæй-рæстæгмæ скæнынц профилактикон мадзæлттæ. Сæхи хæстæй дарддæр ма специалисттæ æххуыс кæнынц иннæ организацитæн дæр. Зæгъæм, дезинфекци скæнынц, бирæ адæм кæм æмбырд кæнынц, ахæм бынæтты: вокзалты æмæ аэропорты.
Цалынмæ ирвæзынгæнджытæ зынг хуыссын кæнынæй сæ арæхстдзинад фæлварынц, уæдмæ та ацы дзулфыцæны у тынг тæвд. Пецы фыцынц дзултæ æмæ адджын гуылтæ. Кусджытæн алы райсом дæр сбарынц сæ тæвд. Цæмæй сæ бон уа æдасæй хæрзхъæд продукци уадзын. Уæвгæ, ацы дзулфыцæн йæ товар канд базарадон тæрхæджытæм не рвиты, фæлæ ма социалон объекттæм дæр.
Æппæт ацы организацитæ сæ архайд нæ баурæдтой пандемияйы рæстæг дæр, стæй уый фæстæ дæр. Уыди сын куысты хицæн уавæртæ. Æмæ цыфæнды ивддзинæдтæ куы æрцæуой, уæддæр, сæ хъуыдымæ гæсгæ, æхгæд не рцæудзысты.
