Федералон программæ «Культурæ»-йы руаджы музей дзуапп дæтдзæн нырыккон домæнтæн, йæ экспозицитæ та хъæздыгдæр
Национ музейы кæронмæ фæхæццæ кæнынц рацарæзты куыстытæ. Ацы культурон хæзнадонæн ис хъæздыг истори. Бындур йын сæвæрдтой 1893-æм азы. Ивгъуыд æнусы 80-æм азты та дзы фыццаг хатт райдыдтой цалцæггæнæн куыстытæ. Зæгъын хъæуы уый æмæ музейы сæйраг бæстыхай кæй уыд бонджын адæймаг Худяковы хæдзар. Ныр та ацы агъуыстыты фенæн ис цымыдисаг историон дзаумæттæ. Федералон программæ «Культурæ»-йы руаджы музей дзуапп дæтдзæн нырыккон домæнтæн, йæ экспозицитæ та хъæздыгдæр. Нæ рагфыдæлты цардыл дзурæг музей куыд раивдзæн уый тыххæй дзуры Хъайтыхъты Фатимæ
Экспозицион залтæ дихгонд сты алы дугтæм гæсгæ. Национ музеймæ чи бакъахдзæф кæны, уый араст вæййы ивгъуыдмæ балцы незаманты дугæй советон рæстæджытæм. Уæлдай æргом здæхт цæуы Ирыстоны историмæ. Хъобайнаг культурæ, кимерийаг-скифаг дуг, сæрмæтты æмæ аланты рæстæджы дзауматæ. Парахатæй дзы равæрдтой Дæргъæвсы мæрдты горæты цы экспонаттæ ссардтой, уыдон дæр.
Национ музейы рацарæзт райдыдта 2008 азы. Хаст æрцыд Уæрæсейы культурæйы паддзахадон программæмæ 2006-2011 азтæн. Æхца кæй нæ фаг кодта, уый тыххæй иу куыстытæ æруырæдтой. Ныртæккæ æххæстæй сцалцæг кодтой зæронд корпустæ: Вахтанговты тамакоты фабрик, Худяковы хæдзар æмæ æрмадзтæ. Куыстытæ æххæст кодтой Мæскуыйæ кæй æрбахуыдтой, уыцы специалисттæ æмæ цæгатирыстойнаг архитектортæ. Æмбал кæмæн нæй, уыцы экспонаттимæ иумæ равдыстадон залты ис мультимедион фæрæзтæ дæр.
Корпусты иумæйаг фæзуат у авд мин квадратон метры. Саив кодтой кæрт дæр æмæ дзы равæрдтой цымыдисаг арт-объекттæ. Музей байгом уыдзæнис фарæстæм сентябры.
