Цæуы Дыгургомы æхсæрдзæн Галдурыдонмæ. Фæндагыл цæст æрхæццæн 10 æрдзон æмæ арт-объектыл.
Национ парк «Алани»-йы байгом экологон къахвæндаг. Цæуы Дыгургомы æхсæрдзæн Галдурыдонмæ. Фæндагыл цæст æрхæццæн 10 æрдзон æмæ арт-объектыл. Проект фадат ратдзæн Цæгат Ирыстоны экологон туризмы инфраструктурæ саразынæн. Уыимæ ма хъыгдард нæ баййафдзысты æрдзон комплекстæ дæр.
Сырх ленты фæстæ райдайы диссæгты дуне. Йæ дæргъ цыппар километры кæмæн у, ахæм хæрзвадат фæндаг, йæ алывæрсты алæмæты æрдзы нывтæ, афтæмæй. Галдурыдонмæ экологон къахвæндаг у хъæддаг æрдзы æппæтдунеон фонды, национ парк «Аланийы» æмæ Бренд Киндеры иумæйаг проект. Бафиппаинаг у уый дæр, æмæ Бренд Киндерæн у йæ фыццаг экологон хъæппæрис. Ацы аз компани рауагъта хъазæнты сæрмагонд коллекци «Натунс». Æвдисы дзы цæрæгойты стæм хуызтæ. Уымæй уæлдай ма радих кодта фондз милуан сомы къахвæндаг саив кæнынæн.
Сæ хъуыды фæрæстмæ. Къахвæндаг рауад, æнхъæл дæр ын куыд нæ уыдысты, афтæ дзæбæх. Фыццаг ыл абалц кодтой, проект кæй руаджы сæххæст кодтой, уыдон. Фæндагыл уыдис дæс æрлæууæн бынаты. Алкæйы раз дæр дзы, æмбал кæмæн нæй, ахæм арт-объект. Мæргъты базыртæ, кæнæ та не заманты гæдытæ. Кæддæр хæдзарон фос цы ран цыди, ахæм рагон фæндаг. Уыцы объекттæ ссардзæнис, æрмæстдæр лæмбынæг чи фæлгæсы, ахæм турист. Бакуыстой сыл бынæттон æрмдæснытæ. Сæ размæ лæууыдис ахсджиаг нысан — хъæддаг æрдзы рæсугъддзинад равдисын, фæлæ йын зиан ма рхæссын.
Экологон акци сæххæст кæнынæн национ парк хуымæтæджы нæ равзæрстой. Экологон къахвæндаг Галдуры донхауæнмæ бренд Киндерæн бацамыдта Хъæддаг æрдзы дунеон фонд. Дыгургом ис экологон тыргъты тигъыл, ацы фæндæгтыл кæддæр цыдысты леопардтæ. Уыцы сырдты фæдтæ ис ссарæн экологон къахвæндагыл.
Туризмы къабазы райрæзты тыххæй йæ хъуыдытæ зæгъы Æрæфы районы разамынд дæр. Экологон къахвæндаг кæй скуыста, уымæ гæсгæ национ парчы æнхъæлмæ кæсынц ноджы фылдæр туристтæм. Фæндагыл ис бадæн бынæттæ, бырæттæн къоппытæ æмæ информацион стендтæ.
Галдурыдонмæ фæндагыл ис æрдзон объекттæ фенæн. Кæрон кæмæн нæй, уыцы Харесы ком, кæнæ та ихтæ чи мур кæны, уыцы Хæйрæджы куырой. Хæххон уæлдæф та раст æвдадзы хосау у. Галдуры донхауæн иу минут дæр нæ ныссабыр вæййы. Фæндаджы кæронмæ чи бахæццæ, уыдонимæ ис чысыл Валерий дæр. Йæ мадимæ ссыдис Кемеровойæ. Ацы балц лæппу рамбылдта бренд Киндеры сæрмагонд сайты. Национ паркæн Галдуры донхауæнмæ фæндаг у йæ фыццаг къахдзæф. Тагъд рæстæг ма сæм бафтдзысты бирæ ног æмæ цымыдисаг проекттæ. Сæ иу – Чифандзары хæххон цъымарамæ фæндаг саразын. Уæдæ ног, хæрзвадат фæндагыл фыццаг хатт чи ацыд, уыдонæн та Дыгургом ссис, ноджыдæр ма кæдæм æрбаздæхдзысты, ахæм бынат.
